Jańaózendegi apat: Jumyla kótergen júk jeńil

Mańǵystaý oblysy ákimi baspa­sóz qyzmetiniń habarlaýynsha, Jańa­ózen­degi jarylys deregi boıynsha qylmystyq is qozǵalǵan. Oqıǵadan kóp uzamaı-aq oblys ákimi Nurlan Noǵaev apattyq jaǵdaıdan habar berip otyrdy.

«Saǵat 10:45-tegi jaǵdaı boıynsha 13 adam medısınalyq kómekke júgindi. Onyń ishinde 8 bala bar. 6 adam aýrýhanaǵa jatqyzylsa, 7 adam úıge jiberildi. Jarylys kezin­de 3 páter qırady. Apattan keıin úı gaz jelisinen birden ajyratyldy. Búginde úıindilerdi tazalaý ju­mys­tary júrgizilip jatyr. Jary­lys deregi boıynsha qylmystyq is qozǵaldy. Oqıǵanyń mán-jaıy tolyq anyqtalady. Oqıǵa ornynda vedomstvoaralyq komıssııa jumys isteıdi», dedi Nurlan Noǵaev kúndizgi baspasóz jıynynyń birinde.

О́ńir basshysy apat saldarynan kóz jumǵandar­dyń otbasyna kóńil aıtty. Sondaı-aq turǵyn úı gazdan ajyratylǵanyn jetkizdi. «Jarylys bolǵan jerden qoqystar shyǵarylyp jatyr. Onyń sebebin anyqtaýǵa kiristik. TJD jedel shtaby men senim telefonyn iske qosty», dedi Nurlan Noǵaev.

Oqıǵa ornynda TJD kúshteri (1 túsirý toby, 9 tehnıka), jergilikti atqarýshy organdar (13 adam jáne 6 tehnıka), SMP (12 adam jáne 6 tehnıka), DP (150 jeke quram jáne 10 tehnıka) IIM Ulttyq ulan (60 áskerı qyzmetker jáne 2 tehnıka) jumys istedi.

Jaraqat alyp, aýrýhanaǵa jat­qy­­zyl­ǵannyń bári travmatologııa bólim­she­sinde em alyp jatyr. Oqıǵa saldarynan 13 adam ortalyq aýrýhanaǵa jetkizilgen. Onyń jeteýi bala, olar jara­qatynyń jeńildigine baılanysty úılerine qaı­ta­rylǵan.

Qalǵandaryna medısınalyq kómek kórsetildi. Sonymen qatar travma­to­lo­gııalyq bólimge túsken ortasha jaǵ­­daıda kúıik alǵan 2 kishkentaı qyz em aldy. Reanımasııa bólimine túsken er adamǵa operasııa jasalǵan. Jaǵdaıy aýyr turǵyndar jansaqtaý jáne qarqyndy terapııa anestezıologııa bólimshesine, bir pasıent oblys­tyq aýrýhanaǵa jedel avıasııalyq tik­ushaq­pen jetkizildi.

«Qaıtys bolǵan azamattardyń otba­syna qaıǵyra kóńil aıtamyn. Zardap shekkenderge jáne olardyń otbasylaryna materıaldyq kómek kórsetiledi, jańa turǵyn úı beriledi. Apattyq jumystarǵa kómek kórsetken eriktiler men qala turǵyndaryna alǵys aıtamyn. Qazirgi ýaqytta barlyq adam úıindilerden shyǵaryldy», dedi Nurlan Noǵaev.

Resmı organdardyń málimetine súıensek, turǵyn úıdegi gaz jarylǵan. TJM málimetinshe, oqıǵa ornynda órt shyqpaǵan. Jarylys saldarynan 150 sharshy metr kireberis qırap, 4 páter zardap shekti.

«Qutqarýshylar úıindi astynan 4 adam men 4 múrde alyp shyqty. Qa­zirgi ýaqytta 6 adam aýrýhanada em alyp jatyr. Tótenshe jaǵdaılar depar­ta­men­­tinde jedel shtab qurylyp, jedel jeli telefony 8/7292/31-90-99 qyzmet kórsetedi», dep habarlady tıisti mekeme.

Úıindilerdi taldaý boıynsha jedel jumystarǵa 40-qa jýyq tehnı­ka men 350-ge jýyq adam, sonyń ishin­de kınologııalyq esep, Ulttyq ulan­nyń áskerı qyzmetshileri, jer­gilikti atqarýshy organdar, jedel medı­sınalyq kómek, polısııa, eriktiler jumyldyryldy.

«Aldyn ala sebep – gaz-aýa qospa­sy­nyń jarylýy. Gaz ballonynyń jarylýy týraly áńgime durys aqparat emes. Gazdyń joıqyn kúshine kelsek, másele mynada. Rasynda, jarylys bolǵan kezde gaz-aýa qospasy kúrt shashyraýy, páter sekildi jabyq keńistikte, ásirese qabyrǵalary bos, temirbeton tóbesi bar bólmede onyń kúshi birneshe ese artady», deıdi Tótenshe jaǵdaılar mınıstrligi Memlekettik órtke qarsy baqylaý departamentiniń basshysy Erlan Tóregeldıev.

О́rtke qarsy qyzmet komıtetiniń tóraǵasy Nurbolat Derbisovtiń boljaýynsha, gaz túnde shyqqan. Qazir Ramazan aıy bolǵandyqtan, adamdar erte oıanyp, tamaq ishýge turyp, jaryqty qosqanda jarylys bolǵan.

Saǵat 18.15-te barlyq avarııalyq-qutqarý jáne úıindilerdi taldaý ju­mys­ta­ry aıaqtaldy. Qazirgi tańda Ja­ńaózen qalasynyń ákimdigi janynan komıssııa qurylǵan. Osy komıssııa ja­rylystyń mán-jaıyn keltirilgen zalaldy anyqtaıdy.

Aıta keterlik jaıt, jarylys bolǵan turǵyn úı 1977 jyly salyn­ǵan. 12 páterlik úı bir kireberis ortalyq­tan­­dyrylǵan gazben qamtylǵan. Úı apat­tyq jaǵdaıdaǵy turǵyn úı tiziminde emes. Úıdiń jalpy aýdany 621 sharshy metrdi quraıdy. Qazir úıindilerdi suryptap, tekserý júrip jatyr. Sodan keıin saraptama júrgizilip, turǵyn úıdi qanshalyqty qalpyna keltirýge bolatyny anyqtalmaq.

«QazMunaıGaz» kompanııasy Jańa­ózende gaz jarylysynan baspanasyz qalǵan turǵyndarǵa jańa páter beredi. Sondaı-aq zardap shekkenderge kómek kórsetiledi. «Turǵyn úısiz qalǵan otba­sylarǵa jańa páter beriledi. Zardap shekkenderge ortalyq jáne jer­gilikti atqarýshy organdarmen bir­lese otyryp, barlyq qajetti kómek kórsetiledi», dep habarlady kompanııa.

Al «О́zenmunaıgaz» AQ munaı­shy­lary jarylystan zardap shekken otbasylarǵa bir kúndik eńbekaqylaryn aýdarýǵa sheshim qabyldady. «О́zen­munaıgaz» AQ-nyń eńbek ujymy ba­qılyq bolǵan azamattardyń qaı­ǵy­syna ortaqtasyp, otbasy, aǵaıyn-týystaryna kóńil aıtady. Kompanııa óz kezeginde apat bolǵan orynda úıindini arshý, tazalaýǵa qajetti tehnıkamen qam­ta­ma­syz etti jáne qajettilikke baı­­la­nysty kómek kórsetýge daıyn. Son­daı-aq mu­naıshylar erikti túrde bir kúndik eńbek­aqysyn zardap shekken adamdarǵa kómek retinde arnaıy shotqa aýdaratynyn málimdeıdi», dep ja­zylǵan kompanııa taratqan aqparatta.