Astana qalasy polısııa departamentiniń bastyǵy Marat Tólebaev shabýyldaýshyny ustaý kezinde batyldyq pen belsendi azamattyq ustanym tanytqan 14 jastaǵy balany marapattady. Zańǵa qaıshy áreketterge kýá bolǵan №49 orta mekteptiń 8-synyp oqýshysy Zańǵar Nııazov qoryqpaı, batyl áreket etti. Elordalyq polısııa basshysy saltanatty túrde jasóspirimge alǵys hat tabystady.
– Beı-jaı qaramaı, batyldyq tanytý – eń joǵary baǵaǵa laıyq. Bul sizdi kez kelgen mınýtta kómekke kele alatyn, janashyr etip tárbıelegen ata-anańyzdyń, muǵalimderińizdiń úlken eńbegi, – dedi Marat Tólebaev.
Esterińizge sala keteıik, 8-synyp oqýshysy keshki ýaqytta Kemeńgeruly kóshesinde áıelge jasalǵan qaraqshylyq shabýylǵa kýá bolǵan. Áıeldiń kómekke shaqyrǵanyn estigen jasóspirim qoryqpaı oǵan júgirip baryp, jaǵdaıyn suraǵan, ózi sol ýaqytta polısııaǵa bolǵan oqıǵa týraly habarlaý úshin dosyna qońyraý shalǵan. Sodan keıin bala eresekterdiń áıelge kómektesýi úshin ótip bara jatqan kólikterdi toqtatqan.
Birneshe mınýttan keıin patrýldik polısııa kelgen. Jasóspirim shabýyldaýshynyń belgilerin sıpattap, polıseılerge er adamnyń qaı baǵytqa bet alǵanyn kórsetken. Tártip saqshylary 30 jastaǵy er adamdy «izin sýytpaı» ustady.
«Astana qalasynyń polısııa departamenti oqıǵaǵa beı-jaı qaramaǵan qala turǵynyna qyraǵylyǵy, jaýapkershiligi jáne qylmysty ashýǵa kómekteskeni úshin alǵys bildirdi. Keıde polısııanyń qyzmeti azamattardyń qoldaýynsyz jáne kómeginsiz múmkin emes. 8-synyp oqýshysynyń áreketi keıde shette qalmaýdyń qanshalyqty mańyzdy ekenin taǵy bir ret dáleldeıdi», delingen Polisia.kz habarlamasynda.
