Oblystyq energetıka basqarmasynyń deregine qaraǵanda, Aqtóbe oblysynda aı saıyn 25 myń tonna janar-jaǵarmaı tutynady. Al naýryz aıynda óńir turǵyndarynyń janar-jaǵarmaı tutyný mólsheri 15 paıyzǵa artqan. Bul Aqtóbe oblysy aımaǵynan ótip jatqan tranzıttik kólikterdiń arzan otyndy kóptep satyp alyp ketýimen baılanysty. Ásirese Reseı Federasııasynyń kórshiles Orynbor oblysyna janar-jaǵarmaı shekteýsiz ketip jatty. Energetıka basqarmasy janar-jaǵarmaı baǵasy ósken kezde de satylymda AI-95 markaly janarmaı 204 teńgeden, al dızeldi otyn 260 teńgeden asyrylmaıdy degen ýádesine qaramastan búgin beketterdegi baǵanyń sharyqtap ketkeni baıqalady.
Aýyl sharýashylyǵy basqarmasy basshysynyń orynbasary Áttıev Asylhannyń aıtýynsha, kóktemgi egis jumystary úshin óńir sharýalaryna 800 tonna arzandatylǵan janar-jaǵarmaı bólindi. Úkimetten bólingen arzandatylǵan dızel otynynyń baǵasy lıtrine 207 teńgeni quraıdy. Qazirgi kezde arzandatylǵan otyn Qobda, Mártók aýdandary jiberildi. Bul ázirge kóktemgi dalalyq jumystarǵa jetkilikti.
