Magerram Magerramov burynǵy kúıeýlerinen ortaq balalarynyń paıdasyna alıment ala almaı júrgen áıelder UKP-ǵa júginetinin atap ótti. Alımentten jaltarǵandar túrli aıla-amaldarǵa júginedi: jasyrynyp, jumys ornyn ózgertedi, naqty kiristerin tómendetedi, turǵylyqty jerin jasyrady.
Depýtattyń aıtýynsha, alıment tóleıtin adamdy sot oryndaýshysyna jáne alıment alýshyǵa jumys ornynyń nemese turǵylyqty jeriniń ózgergeni týraly, sondaı-aq qosymsha tabystyń nemese ózge de tabystyń bar ekendigi týraly habarlaýǵa mindetteıtin zańnamalyq norma oryndalmaı júr.
Depýtattyń málimetinshe, is júrgizýde 273 136 is bar, balalarǵa arnalǵan alıment boıynsha qasaqana tólemeıtinderdiń bereshegi 12,8 mıllıard teńgeni quraıdy.
«Biz Úkimettiń osy ótkir áleýmettik máseleni sheshý úshin shara qabyldanyp jatqanyn, «Alıment tóleýdiń otyz qadamy» sııaqty arnaıy baǵdarlamalar qurylǵanyn estidik, alaıda balalardyń paıdasyna alıment óndirip alý máselesi jyl saıyn nasharlaı túsýde. Bizdiń partııa alǵash ret altynshy shaqyrylymda alıment óndirip alý máselesi boıynsha máseleni kóterdi, sodan keıin bereshek 2 mıllıardty qurady. Búgingi tańda, qaryz 12 mıllıardtan asady», dedi Magerram Magerramov.
Ol óndirip alý kezinde alıment tóleý somasy eń tómengi kúnkóris deńgeıinen tómen bolmaýy kerek dep sanaıdy.
«Biz shet elderdiń tájirıbesi boıynsha memlekettik alıment qoryn qurýdy usynamyz. Bul bala úshin qurylǵan memlekettik kómek bolar edi. Qazaqstanda da qor qurý tájirıbesi bar, máselen, 2018 jyly «Jábirlenýshilerge ótemaqy qory týraly» zań qabyldandy», dedi Magerram Magerramov.
Aıta ketsek, Qazaqstanda alıment tóleýdiń qazirgi júıesi 1936 jyldan bastap jumys isteıdi. Alıment tóleýshilerdiń eń kóp sany: Astana – 13 848 (3571 problemalyq), Almaty oblysy – 20 131 (676 problemalyq), Qaraǵandy oblysy – 23 265 nemese (1642 problemalyq), Shyǵys Qazaqstan oblysy - 20 138 (1682 problemalyq) jáne Túrkistan oblysy – 18 663 (558 problemalyq).
