Sáýir aıynyń basynan beri saıabaq qyzmetkerleri ormanda qustarǵa arnap 98 úıshik ornatty. Odan bólek, ózen-kólderdiń jaǵalaýynda jasandy 52 uıa jasaldy.
Orman ınspektorlary halyqtyń qorshaǵan orta týraly tanymyn keńeıtip, ekologııalyq bilim berýdi qolǵa alǵanyna da toqtala ketken jón. Atap aıtqanda, mektep oqýshylary men kolledj stýdentteriniń arasynda tabıǵatty qorǵaý taqyrybyndaǵy qyzyqty vıktorınalar ótip jatyr. Al qoryqshylar jastarǵa orman qyzmetiniń qyzyǵy men qıyndyǵy jaıly áńgimelep berdi.
Kún jylyna kele jergilikti halyqty ekologııalyq senbilikke shaqyrý josparlanyp otyr. Sondaı-aq balǵyn qylqalam sheberleriniń arasynda tabıǵat taqyrybynda sýret baıqaý ótpek. Qorshaǵan ortany qorǵaýǵa baǵyttalǵan osy tektes is-sharalar úsh aı boıy ótedi.
Memlekettik tabıǵı qoryqtar, ulttyq parkter, tabıǵı rezervattar jyl saıyn ótkizetin dúnıejúzilik «Parkter sherýi» aksııasynyń tarıhy ótken ǵasyrdyń orta sheninen bastalady. Aýqymdy is-shara halyqtyń, qoǵamnyń, bılik ókilderiniń, buqaralyq aqparat quraldarynyń jáne kásipkerlerdiń nazaryn erekshe qorǵalatyn tabıǵı aýmaqtardyń ózekti máselelerine aýdarýǵa baǵyttalǵan.
