О́zbekstan Prezıdenti Shavkat Mırzııoev Memleket basshysyna uzaq ǵumyr, zor densaýlyq jáne onyń asa jaýapty qyzmetine úlken jetistik tilep, dostas Qazaqstan halqyna beıbitshilik jáne odan ári damı berýine nıettestik bildirdi.
«Sizdi jáne búkil Qazaqstan halqyn musylman qaýymy úshin qasıetti sanalatyn Oraza aıt merekesimen quttyqtap, shyn júrekten izgi tilekterimdi joldaǵanyma óte qýanyshtymyn. Bizdiń berik saıası erik-jigerimiz ben birlesken is-áreketimizdiń arqasynda elderimiz arasyndaǵy dostyq jáne tatý kórshilik baılanystar nyǵaıyp, tereńdeı túsetinin erekshe yqylaspen atap ótkim keledi», dep jazylǵan О́zbekstan Prezıdentiniń jedelhatynda.
Qyrǵyzstan Prezıdenti Sadyr Japarov óziniń quttyqtaý jedelhatynda Oraza aıt merekesi baýyrlas halyqtarymyzǵa tatýlyq pen baq-bereke ákeletinine senim bildirdi.
«Qyrǵyzstan men Qazaqstan arasyndaǵy ortaq rýhanı qundylyqtar men dostyqqa, sondaı-aq strategııalyq seriktestikke negizdelgen kópjaqty qatynastar birlesken kúsh-jigerimizdiń arqasynda dáıekti túrde damı beretinine senimdimin», dep jazylǵan Sadyr Japarovtyń jedelhatynda.
Tájikstan Prezıdenti Emomalı Rahmon Qasym-Jomart Toqaevqa zor densaýlyq, baqyt jáne tabys, al Qazaqstan halqyna beıbitshilik, turaqtylyq tilep, odan ári ornyqty damı berýine nıettestik bildirgen.
«Osy berekeli meıramnyń myzǵymas dástúri men taraptardyń birlesken kúsh-jigeriniń negizinde eki el arasyndaǵy dostyq qarym-qatynas pen kópjaqty ózara tıimdi yntymaqtastyq halyqtarymyzdyń túpki múddelerine sáıkes nyǵaıyp, múlde jańa ári joǵary deńgeıge kóterile beretinine senimdimin», dep atap ótken Tájikstan Prezıdenti.
Ázerbaıjan Prezıdenti Ilham Álıev óziniń quttyqtaýynda Ázerbaıjan men Qazaqstan arasyndaǵy memleketaralyq baılanystar men yntymaqtastyqtyń qarqyndy damyp kele jatqanyna joǵary baǵa berdi.
«Biz baýyrlas ári senimdi seriktesimiz Qazaqstanmen odaqtastyq qatynastardy tereńdetý jolynda birlesken kúsh-jigerimizdi odan ári tabysty jalǵastyrýǵa nıettimiz. Men sizdiń keremet elińizge jaqynda jasaǵan saparymdy zor yqylaspen eske alamyn. Osy aıtýly merekede Sizge zor densaýlyq, baqyt, Sizdiń asa jaýapty qyzmetińizge tabys, al baýyrlas Qazaqstan halqyna beıbitshilik pen baq-bereke tileımin», dep jazylǵan jedelhatta.
Túrikmenstan Prezıdenti Serdar Berdimuhamedov Memleket basshysy men Qazaqstan halqyna óziniń quttyqtaýy men izgi tilekterin joldady.
«Islam dininiń irgeli rýhanı qundylyqtaryna súıene otyryp, jaqsylyq, izgilik, meıirimdilik saltanat quratyn bul jarqyn mereke búkil musylman úmbeti arasynda ózara túsinistikti, yntymaq pen beıbitshilikti nyǵaıtýǵa yqpal etetinine kámil senemin», dep jazdy Túrikmenstan Prezıdenti.
Sonymen qatar Qazaqstan Prezıdentine Iordanııa Koroli II Abdalla, Bahreın Koroli Hamad ben Isa Ál Halıfa, Kýveıt Ámiri Sheıh Naýýaf ál-Ahmed ál-Djaber As-Sabah, Oman Sultany Haısam ben Tarıq, Palestına Memleketiniń Prezıdenti Mahmýd Abbas, Kýveıttiń Taq murageri Meshal ál-Ahmed ál-Djaber As-Sabah, Lıvııa Prezıdenttik keńesiniń tóraǵasy Muhammed Iýnıs ál-Manfı, Tatarstan Raısy Rýstam Mınnıhanov quttyqtaý jedelhattaryn joldady.
