Energetıka mınıstri Almasadam Sátqalıev óz baıandamasynda Memleket basshysynyń tapsyrmalaryn oryndaý aıasynda Ekibastuz energııa torabyn keshendi túrde jańǵyrtý júrgiziletinin, bul shamamen 3 GVt jańa generasııany engizýge múmkindik beretinin atap ótti. Sondaı-aq jeltoqsan aıynda qýaty 500 MVt Ekibastuz GRES-1-de 1-shi energoblok qalpyna keltiriledi. Jalpy qýaty 1 200 MVt-tan asatyn 3 jáne 4 energııa bloktaryn engizý arqyly GRES-2-ni keńeıtý boıynsha jumys júrgizilýde. Jalpy qýaty 1 200 MVt bolatyn 5 jáne 6 energııa bloktaryn salý boıynsha jobalaý aldyndaǵy jumystar bastalady.
Mınıstrdiń aıtýynsha, Ekibastuz JEO jańǵyrtý sheńberinde osy jyly uzyndyǵy 5,3 km jylý jelilerin kúrdeli jóndeýdi aıaqtaý, 5 sý jylytý qazandyǵy boıynsha jóndeý jumystaryn júrgizý, JEO-nyń 3 energetıkalyq qazandyǵyn, sondaı-aq qosalqy jabdyqtardy, ǵımarattar men qurylystardy jańǵyrtýdy sońyna deıin jetkizý josparlanýda.
Jalpy ekonomıkanyń elektr energııasyna ósip kele jatqan qajettiligin óteý úshin 2035 jylǵa deıin 17,3 GVt jańa qýattar engiziledi.
Sondaı-aq mınıstr dızel otynynyń jalpy qorynyń 370 myń tonnaǵa deıin ulǵaıǵanyn, bul eldiń 21 táýliktik qajettiligin óteýge jetkilikti ekenin atap ótti. Tutastaı alǵanda, naryqtyq ekonomıkaǵa qaraı qabyldanǵan baǵdar munaı óńdeý zaýyttarynyń tehnıkalyq qaıta jaraqtalýy men senimdiligin qamtamasyz etedi, sondaı-aq salanyń ınvestısııalyq tartymdylyǵyn arttyrady.
