Qostanaı oblysy boıynsha Memlekettik kirister departamenti Qostanaı oblysy boıynsha Shekara qyzmeti departamentimen birlesip «Obaǵan» avtomobıl ótkizý beketinde Reseıden bıdaı ákelýdiń kezekti áreketiniń jolyn kesti.
«Bıdaıdy ákelýge tyıym salynǵanyna qaramastan, shekteýdi «aınalyp ótý» maqsatynda syrtqy ekonomıkalyq qyzmetke qatysýshylar taǵy da 30 tonna bıdaıdy basqa taýarmen jasyryp, jalǵan qujattarmen ótkizýge tyrysty», delingen Memlekettik kirister departamentiniń habarlamasynda.
Esterińizge sala keteıik, 21 sáýirde «Qaıraq» ótkizý beketinde jalpy salmaǵy 60 tonnadan asatyn bıdaı ákelýdiń 2 áreketi toqtatylǵan bolatyn.
Qostanaı oblysy boıynsha Memlekettik kirister departamenti syrtqy ekonomıkalyq qyzmetke qatysýshylardy Qazaqstan Respýblıkasynyń qoldanystaǵy zańnamasyn saqtaýǵa shaqyrdy. Osy baǵyttaǵy jumys ári qaraı jalǵasady.
