Memleket basshysy Qasym-Jomart Toqaev 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty halyqqa Joldaýynda jemqorlardan alynǵan qarajatty bilim berý ınfraqurylymyn qoldaýǵa baǵyttaýdy tapsyrǵan edi.
«Jalpy, mektep salý Úkimet pen ákimdikter úshin basty mindetterdiń biri bolýy kerek. Jemqorlar sottalǵanda, olardyń zańsyz tapqan qarjysy memleketke ótip, túgeldeı mektep qurylysyna jumsalýǵa tıis», dedi Qasym-Jomart Toqaev.
QR Premer-mınıstriniń baspasóz qyzmetiniń málimetine súıensek, búgingi tańda Bilim berý ınfraqurylymyn qoldaý qoryna 121,7 mlrd teńge tústi. Sonymen qatar el basshylyǵynyń tapsyrmasy boıynsha Respýblıkalyq bıýdjet komıssııasy 106,7 mlrd teńgeni quraıtyn 72 jobany qoldady. Atap aıtqanda, 94,1 mlrd teńge 85 myń oryndyq 69 mekteptiń qurylysyn aıaqtaýǵa jáne taǵy 12,6 mlrd teńge 3 jańa nysannyń (eki aýysymda 1400 orynǵa arnalǵan 2 mektep jáne 200 oryndyq mektep-ınternat) qurylysyn aıaqtaýǵa josparlanǵan.
