Aıta keteıik, osy jyldyń 10 qańtarynan bastap pılottyq rejımde qalalyq №4, №5 jáne №10 emhanalarda jedel medısınalyq kómek bólimsheleri iske qosylǵan edi. Ondaǵy negizgi maqsat – stasıonardaǵy dárigerler júktemesin azaıtý jáne shuǵyl alǵashqy kómek qoljetimdiligin arttyrý.
Búgin Astana qalasynyń Qoǵamdyq densaýlyq saqtaý basqarmasynyń basshysy Tımýr Muratov №6 qalalyq emhanada ashylǵan bólimshege bardy.
Basqarma basshysynyń aıtýynsha, pılottyq rejımde ashylǵan bólimshelerdiń 3 aı ishindegi jumys nátıjesi kóńil qýantarlyq. Stasıonarlardyń qabyldaý bólimderine kelip túsken ótinishter sany edáýir azaıyp, júkteme jeńildegen.
«Qazir №2 qalalyq balalar aýrýhanasyna kún saıyn 300-350-deı naýqas keledi. Bárińizge málim, bul kórsetkish kóktem-jaz aılarynda ulǵaıady. Bul jaraqat alýdyń, ásirese balalar arasyndaǵy kóshe jaraqattarynyń maýsymy desek te bolady. Jedel medısınalyq kómek bólimshesiniń basymdylyǵy – turǵyndarǵa alǵashqy kómekti qoljetimdi jáne qolaıly etý», dedi ol.
Sondaı-aq Tımýr Muratov № 2 qalalyq kópbeıindi aýrýhananyń Akýsherlik jáne negizgi blogy arasynda jobalanyp jatqan qabyldaý-dıagnostıkalyq keshen bazasynda balalar travmatologııalyq pýnktin ashý josparlanyp otyrǵanyn atap ótti.
Memleket basshysy Qasym-Jomart Toqaevtyń tapsyrmasyna sáıkes, ákimdik tarapynan densaýlyq saqtaý salasyna basym kóńil bólinýde. Buǵan elordanyń negizgi medısınalyq-demografııalyq kórsetkishter boıynsha reıtıngte kósh bastap turǵany dálel. Turǵyndar úshin sapaly medısınalyq qyzmet deńgeıin arttyrý baǵytynda jumys ári qaraı da jalǵasady.
