Baıqońyr aýdanynda ekologııalyq aılyqty uıymdastyrý jáne ótkizý sheńberinde aýdan aýmaǵyn jınaýǵa barlyq uıym men mekeme, kásiporyndar, ShOB jáne bazarlar, áleýmettik nysandar jáne basqa da mekemeler men basqarmalar túgel derlik qatysty. Árqaısysy jyldaǵy tártip boıynsha ózderine tıesili aýmaqty jıyp-terip, tap-tuınaqtaı etip tazalap shyqty.
Ákimdik apparatynyń qyzmetkerleri senbilik tııanaqty atqarylýy úshin áýeli birqatar uıymdarmen birlesip, irgeles jáne bekitilgen aýmaqtarda qajetti is-shara túrlerin kórsete otyryp, 5000-nan astam habarlamany qulaqtandyrý jáne taratý boıynsha aýqymdy jumys júrgizdi.
Nátıjesinde, aýdan boıynsha senbilikke barlyǵy 10 myńnan astam adam qatysty. Kósheler boıyndaǵy qoqystardy jınap, tıep áketýge 100-den asa arnaıy tehnıka jumyldyryldy.
Úlken senbilik sheńberinde aýdan turǵyndarynyń báriniń jan-júregin jylytyp, qýanyshqa bólegen izgiligi mol bir sharany arnaıy aıtyp ótkimiz keledi. Baıqońyr aýdanynyń ortalyq alańdardyń biri – Jumabek Táshenov kóshesi boıyndaǵy saıabaqqa aǵash otyrǵyzý rásimine Astana qalasy máslıhatynyń hatshysy Erlan Kanalımov bastaǵan elorda depýtattary, aýdan ákimi Erlan Jaýlybaev arnaıy kelip, óz qoldarymen kóshet ekti.
Astanany jasyl jelekpen abattandyrýdyń ıgilikti sharasyna Baıqońyr aýdanynyń aýmaǵyndaǵy Úndistan, Túrikmenstan elshilikteriniń ókilderi, qalalyq basqarma basshylary, Jazýshylar odaǵynyń músheleri, aýdandyq ardagerler keńesiniń músheleri, sondaı-aq «Jas sarbazdar» jasóspirimder áskerı-patrıottyq ortalyǵynyń órenderi jáne aýdannyń belsendi turǵyndary qatysty. Bul kórinis bizge qazaq halqynyń birtýar tulǵasy Jumabek Táshenovke kórsetilip jatqan taǵzym qurmetindeı áser etti.
Negizi, jalpyqalalyq senbiligi aıasynda «Baıqońyr» aýdanynyń barlyq derlik aýmaǵynda aǵash otyrǵyzylyp, janǵa jyly ıgi shara aýqymdy túrde uıymdastyryldy. Kórsetilgen saıabaqqa barlyǵy 100-den asa kóshet egilip, onyń aýmaǵy qoqystardan tazartyldy. Senbi tańyn serpindi senbilikten bastaǵan, izgi iske qatysýshylardyń barlyǵyna ystyq taǵam usynylyp, kóńildi konserttik nómirler qoıyldy. Bul mádenı-rýhanı shara kelýshilerge erekshe kóńil kúı syılady.
Bularmen birge J.Táshenov, M.Ǵabdýllın, A.Pýshkın jáne 191 kóshesine, oǵan qosa Qarýly Kúshterdiń «Ulttyq áskerı-patrıottyq ortalyǵy» RMM jáne Tólegen Aıbergenov atyndaǵy №16 orta mektep aýmaqtary boıynsha 1205 birlik kóleminde jasyl jelek otyrǵyzyldy.
Sol kúni Baıqońyr aýdany aýmaǵyndaǵy jalpy senbilikke barlyǵy 10 myńnan asa adam qatysyp, 1200-den asa aǵash otyrǵyzyldy.
