Qazaqstan halqynyń Birligi kúni aıasynda Trıatlon saıabaǵynda túrli etnos ókilderiniń qatysýymen dástúrli túrde aǵash otyrǵyzylyp, salaýatty ómir salty nasıhattalyp, júgirýden estafeta ótti.
«Memleket basshysy Qasym-Jomart Toqaev Qazaqstan halqy Assambleıasy HHHII sessııasynyń otyrysynda saıası modernızasııalaý jáne etnosaralyq kelisiminiń rólin aıryqsha atap ótken edi. Mine búgin sol is-shara jalǵasyn taýyp jatyr. Búgingi merekege oraı bul jarys alǵash ret uıymdastyrylyp jatyr», dedi Astana qalasy ákiminiń orynbasary Eset Baıken.
Jarysqa 300-den astam áýesqoı sportshy jınalyp, 500 metr, 2,5 km jáne 5 shaqyrym boıynsha júgirdi. Saltanatty is-sharanyń sońynda qatysýshylardyń bári arnaıy medaldarmen marapattaldy.
«Búgin biz Qazaqstan halqynyń birligi kúnin atap ótip jatyrmyz. Elimizde qoǵamdyq kelisimdi saqtaý, ulttyq birlikti nyǵaıtý el bolashaǵynyń tabysty kepili bolyp qala beretini anyq. Mereke kúni sizderge jáne otbasylaryńyzǵa zor densaýlyq, tabys jáne kóktemgi kóńil-kúı tileımin!», dedi «Vaınah» sheshen-ıngýsh etnomádenı birlestigi» qoǵamdyq birlestiginiń tóraǵasy Bashır Solsanov.
Aıta keteıik, Qazaqstan halqynyń birligi kúnine oraı apta basynan beri Astana qalasynda 70-ke jýyq is-shara uıymdastyryldy, olardyń kópshiligi elorda turǵyndary men qonaqtaryna merekelik kóńil-kúı syılaý úshin ashyq alańdarda ótkizildi.
Búgin elordanyń tórt alańynda shyǵarmashylyq ujymdar men qala ártisteriniń qatysýymen konserttik baǵdarlamalar ótip jatyr. Merekelik konsert, teatrlandyrylǵan kórinister, sırk kórsetilimderi, balalarǵa arnalǵan is-sharalar, sporttyq sharalar jáne saýda jármeńkesi Saryarqa aýdanyndaǵy Qalalyq alańda, Esil jáne Nura aýdandary turǵyndary úshin Báıterek monýmenti mańynda, Almaty aýdanynda Beıbitshilik jáne kelisim saraıy janyndaǵy Amfıteatrda, Baıqońyr aýdany turǵyndary úshin Jazýshylar alleıasy alańynda ótip jatyr.
