Bul ortalyqtardyń birazy tyńǵylyqty túrde halqymyzdyń mádenıetiniń keregesi keńeıýine septigin tıgizip júrgeni anyq. Solardyń biri - AQSh astanasy Vashıngton qalasyndaǵy Abaı ortalyǵy.
Atalǵan ortalyq 2020 jyly Djordj Vashıngton ýnıversıteti janynda qurylǵan. Sol ýaqyttan beri arnaýly joba aıasynda uly aqyn, kemeńger Abaı Qunanbaıulynyń shyǵarmalarymen qatar, Qazaqstannyń tarıhy, salt-dástúri jáne mádenıeti týraly amerıkalyq sarapshylardyń suhbattary men akademııalyq eńbekteri jaryq kórdi. Ortalyq jalpy Qazaq mádenı ortalyǵy sanalady.
Mazmundy ári qyzyqty kontent usyný maqsatynda «HH ǵasyrda Batys saıahatshylarynyń Ortalyq Azııaǵa jasaǵan saparlary týraly qundy jazbalar» aıdary ashylyp, «Uly dala áýezderi» podkastar serııasy tyńdarmandarǵa usynyldy. Ortalyqtyń tolyqqandy qyzmetin www.abaicenter.org siltemesine ótý arqyly oqýǵa bolady.
Osyǵan baılanysty oılaryn ortaǵa salǵan Abaı ortalyǵynyń prodıýseri Aıtolqyn Qurmanova: «Abaı ortalyǵy, jalpy alǵanda, amerıkalyqtar men aǵylshyn tildi aýdıtorııany qazaq mádenıetiniń ózgeshe álemimen tanystyrýǵa baǵyttalǵan mádenı baǵdarlama. Biz munda eń aldymen dúnıe júziniń ǵalymdaryna elimizdiń mádenıeti, tarıhy, óneri, mýzykasy, kınosy men ádebıeti jóninde durys túsinik berý, zertteý jasaýlaryna kómektesý maqsatynda jumys isteımiz.
Olardyń muqııat zerttelgen jáne shynaıy eńbekteri arqyly biz qazaq mádenıetin zerdeleýde burynnan kele jatqan jańsaq pikirler, mıfter, shyndyqqa janaspaıtyn kózqarastar jóninde tıisti túsinikter berip, halqymyzdyń shynaıy beınesin tanytýǵa tyrysamyz. Biz beınerolıkter, podkasttar, maqalalar, aýdarmalar jasaımyz jáne osy kásibı til arqyly qazaq áleminiń ózgeshe keńistigin ashýǵa talpyndyq. Ulttyq úlgidegi fılmder, shyǵarmalar, kúıler men rámizder sheteldik aýdıtorııany ǵana emes, Qazaqstan halqynyń ózi úshin de qyzyqty sanalmaq», deıdi.
Biz sóz etip otyrǵan Abaı ortalyǵynyń damýyna qarjylaı kómek beretinder de az emes. Solardyń biri - «Altynalmas» AQ basqarma múshesi, Turaqty damý jónindegi bas atqarýshy dırektory Bahrom Djalolov. Ol: «Abaı ortalyǵymen seriktestigimiz Qazaqstannyń tarıhı tanymdyq turǵydan taǵylymdy dúnıelerdi aǵylshyn tildi elder arasynda álemdik deńgeıde nasıhattaýǵa múmkindik beredi dep oılaımyz. Sondyqtan, «Altynalmas» osy ortalyqtyń júzege asyryp jatqan jobalaryn jáne ulttyq mádenıetti shetelde tanymal etý jolyndaǵy qulshynystaryna ár qashan qol ushyn beredi», degen oıymen bólisti.
Muhıttyń ar jaǵynda ornalassa da óz halqynyń rýhanı qundylyqtaryn Batys álemine tanystyrýdy birden-bir maqsat etken Abaı ortalyǵy arnaıy aıdarlar ashyp, qazaq ádebıetiniń jaýharlaryn, mádenı muralaryn aǵylshyn tilinde jarııalap keledi. Aıtalyq, «Qazirgi qazaq ádebıeti: poezııa jáne proza», Abaıdyń, Muhtar Áýezovtiń týyndylary men Ánýar Álimjanovtyń «Ustazdyń oralýy» atty romanyn, «Qazaqstannyń qolóner jáne shyǵarmashylyq ekonomıkasy» atty zertteý eńbegin, Táttimbet, Qazanǵap, Dına Nurpeıisova sııaqty kúıshilerdiń shyǵarmalaryn aǵylshyn tilindegi túsindirmesimen birge atalǵan ortalyqtyń saıtyna júktep, ózge tildegi oqyrmandarǵa usyndy.
