Bank málimetinshe, ADB sharttaryna sáıkes Astana, Almaty, Aqtaý jáne Atyraý qalalaryna zaemnyń jalpy kóleminiń 40% aspaıtyn bóligin nemese 200-ge jýyq nesıe bólý josparlanýda.
Nesıeniń 60% oblystar men shaǵyn qalalardyń turǵyndaryna berilmek. Bul óńirlerdegi qazaqstandyq áıelderdi qoldaý jáne nesıeleýde dısproporsııany boldyrmaý maqsatynda jasalǵan.
Baǵdarlama boıynsha beriletin zaemnyń eń joǵarǵy quny - 30 mln teńgege deıin. Paıyzdyq mólsherleme 14,4 paıyzǵa (JTSM - 15,4 paıyzdan bastap) teń, keıin ol 3,5 paıyzdan 5 paıyzǵa deıin (JTSM - 3,6 paıyz bastap) tómendetiledi.
«Umaı» baǵdarlamasy boıynsha qaryz alý merzimi - 6 aıdan 25 jylǵa deıin. Bul rette turǵyn úı tańdaýda shekteý joq, ony alǵashqy jáne ekinshi naryqtan, sonyń ishinde úlestik qatysý sharttary boıynsha satyp alýǵa bolady. Sondaı-aq «Umaı» boıynsha baspanany jóndeý jumystaryna da 3,7 mln teńgege deıingi mólsherde qaryz alýǵa bolady.
Áleýetti qaryz alýshynyń aı saıynǵy otbasylyq tabysy 550 000 teńgeden aspasa, ol 15 paıyzdyq bastapqy jarnamen nesıe ala alady. Al otbasynyń ortaq kirisi aıyna 550 001 teńgeden 640 000 teńgege deıingi aralyqta bolsa, onda turǵyn úıdi 20 paıyzdyq alǵashqy jarnamen alýǵa bolady.
«Umaı» baǵdarlamasy boıynsha nesıeni otbasybank.kz portalynda onlaın nemese bank bólimshelerinde jáne keńes berý ortalyqtarynda rásimdeýge bolady.
