Osy oraıda Sybaılas jemqorlyqqa qarsy is-qımyl agenttigi Memleket basshysynyń tapsyrmasyn oryndaý maqsatynda «Bızneske jol» jobasyn júzege asyrýdy bastady. Kásipkerler aldynda kese-kóldeneń turatyn ártúrli ákimshilik kedergilerdi azaıtyp, qujattardy rásimdeý kezinde olardy áýre-sarsańǵa túsirmeýdi kózdegen joba aıasynda agenttiktiń oblys boıynsha departament mamandary «Atameken» kásipkerler palatasy ókilderimen birlesip tıisti jumystar uıymdastyryp keledi. Problemalyq máselelerdi taldaý úshin áleýmettik jelilerde, onyń ishinde «Atameken» palatasynyń ınternet resýrstarynda keri baılanys arnalary iske qosyldy.
Kásipkerlerdiń jigerin qum, talabyn un qylyp otyrǵan máselelerdiń negizgisi jer ýchaskelerin paıdalaný merzimin uzartý, bıznes júrgizýde atqarýshy organdardan túrli kelisimder alý bolyp otyr. Tipti atqarǵan jumystarynyń aqysyn ala almaı áýrege túsip júrgender de az emes. Kezdesýlerdiń birinde departament ókilderine bir jeke kásipker jer ýchaskesin jalǵa berý merzimin uzartýdan qalalyq jer komıssııasy negizsiz bas tartqany jóninde ótinish bildirgen. Alty aı boıy naqty jaýap ala almaı qajyǵan kásipkerdiń máselesin tekserý barysynda byltyr ákimdik 7 kásipkerdiń dál osyndaı ótinishin aıaqsyz qaldyrǵany belgili boldy.
Departament pen jergilikti atqarýshy organnyń birlese talqylaýynan keıin kásipkerlerdiń ótinishteri qaıta qaralyp, jer telimin jalǵa berý merzimin uzartý týraly sheshim shyǵaryldy. Taǵy bir kásipker kvazımemlekettik uıymmen shart jasasyp, kenishterdiń ǵımarattary men nysandaryn rekonstrýksııalaǵan. Bári bitip, aqy tóleıtin kez jetkende kvazımemlekettik mekeme bastapqy jobalaý-smetalyq qujattamany túzetý qajettigin alǵa tartyp, jumysty qabyldamaı tastaıdy. Osydan keıin taban aqy, mańdaı teriniń óteýin ala almaǵan kásipkerdiń sabylysy bastalady.
Isti tekserý kezinde shartta jáne tehnıkalyq erekshelikte bastapqy jobalaý-smetalyq qujattamasyna túzetý kózdelmegeni belgili boldy. Demek, kvazımemlekettik uıymnyń qoıyp otyrǵan talaby zańsyz. Departament túsindirý jumystaryn júrgizgennen keıin kásipkerge 88,7 mln teńge tolyq tólendi. Tekserý barysynda jergilikti atqarýshy organ tarapynan jeke balabaqshalardy jan basyna shaqqandaǵy normatıvtik qarjylandyrýda biraz kásipkerdiń quqyqtary shektelgeni anyqtaldy. Mysaly, qalalyq bilim bólimine qarasty 206 jeke mektepke deıingi uıymdardyń elý besin qarjylandyrý – 10,5, al dál osyndaı 99 balabaqshaǵa tólem 9 saǵattyq koeffısıentpen júrgizilgeni belgili boldy. Departamenttiń aralasýynan keıin qalalyq bilim bólimi 99 jeke balabaqshany 10,5 saǵattyq koeffısentpen qarjylandyrý jóninde sheshim qabyldap, jalpy bólinetin qarajat kólemi 828 mln teńgege ulǵaıdy.
Qyzylorda oblysy
