Sondaı-aq jıyn barysynda bilim berý, mádenı-gýmanıtarlyq salalardaǵy ózara is-áreket máseleleri talqylandy.
«Qazaqstanda tájik halqyna erekshe qurmetpen qaraıdy, sondaı-aq dostyq, baýyrlastyq jáne ózara qoldaý rýhyndaǵy yntymaqtastyǵymyzdy nyǵaıtýǵa aıryqsha mán beredi. Sondyqtan bul sapar óte mańyzdy. Jańa ǵana sizdiń saparyńyzdy tarıhı sapar dep atap óttik. О́ıtkeni ol elderimiz arasyndaǵy yntymaqtastyqty jańa deńgeıge shyǵarady. Eki el arasynda Odaqtastyq ózara is-qımyl týraly deklarasııaǵa qol qoıylady. Bizdi alda úlken jumys kútip tur. Sebebi odaqtastyq qarym-qatynas aıasynda jańa strategııalyq jobalar júzege asyrylady. Biz jańa ǵana eki nemese úsh iri strategııalyq joba ázirleý qajet ekenin aıttyq. Eki el úkimetterine osy mindetti júzege asyrý jóninde tapsyrma berdik. Jaqyn arada ekijaqty qarym-qatynas jańa deńgeıge kóteriledi dep oılaımyn», dedi Qazaqstan Prezıdenti.
Qasym-Jomart Toqaev óz sózinde eki el arasynda túrli sala boıynsha 100-den asa kelisimsharttan turatyn mańyzdy kelisimsharttyq-quqyqtyq baza bar ekenin eske saldy. Endi búgin bul tizim jańa kelisimdermen tolyǵady.
«Memleketterimiz arasynda barlyq deńgeıde senimdi saıası dıalog jolǵa qoıylǵan. Biz Ortalyq Azııanyń turaqty damýy men qaýipsizdigin qamtamasyz ete otyryp, birneshe halyqaralyq qurylym aıasynda ózara is-áreket júrgizemiz. Eki el arasynda túrli sala boıynsha 100-den asa kelisimsharttan turatyn mańyzdy kelisimsharttyq-quqyqtyq baza bar. Búgin bul tizim jańa kelisimdermen tolyǵady. Uzaq jyldardan beri Qazaqstan – Tájikstannyń ekinshi iri saýda seriktesi. Bizdegi derek boıynsha tek byltyrdyń ózinde ózara saýda kólemi 1,4 mıllıard dollarǵa jetti», dedi Memleket basshysy.
Qazaqstan Prezıdentiniń aıtýynsha, aldaǵy ýaqytta orta ǵasyrdaǵy áıgili ǵulama, fılosof ári shıpager Ábý Álı ıbn Sınanyń eskertkishin ashý josparlanyp otyr.
«Ekonomıkalyq yntymaqtastyq jónindegi úkimetaralyq komıssııa, sondaı-aq Taýar aınalymyn arttyrý jónindegi jumys toby ekijaqty qatynastardy ilgeriletýge eleýli úles qosyp keledi. Olardyń jumysyna Qazaq-tájik iskerlik keńesi de atsalysady. Taýar aınalymyn arttyrý jónindegi 2023-2024 jyldarǵa arnalǵan jol kartasyn júzege asyrý úshin belsendi jumystar júrgizilip jatyr. Biz mádenı-gýmanıtarlyq baılanystardy damytý máselesine de talqyladyq. Bul – yntymaqtastyǵymyzdyń mańyzdy baǵyty. Orta ǵasyrdaǵy áıgili ǵulama, fılosof ári shıpager Ábý Álı ıbn Sınanyń eskertkishin ashý josparlanyp otyr. Osy jetistikterdiń bári eki el halyqtarynyń erekshe yqylasyna ıe bolady jáne ózara tyǵyz qarym-qatynasymyzdyń jarqyn úlgisi sanalady. Biz elimizde Tájikstannyń mádenıet kúnderin ótkizý jóninde ýaǵdalastyq. Mádenıet kúnderi aıasynda Tájikstannyń aýyl sharýashylyǵy salasyndaǵy jetistikteri de tanystyrylady. Muny asa mańyzdy is-shara dep sanaımyn», dep atap ótti Prezıdent.
Tájikstan Prezıdenti Emomalı Rahmon Astanaǵa memlekettik saparmen kelýge shaqyrǵany jáne qazaq halqynyń dástúrli qonaqjaılyǵy úshin Qasym-Jomart Toqaevqa alǵys aıtty. Sondaı-aq ol shaǵyn quramdaǵy kelissózdiń nátıjeli bolǵanyn jáne birlesken jobalardy júzege asyrý mańyzdy ekenin atap ótti.
«Biz Qazaqstanmen aradaǵy ózara tıimdi yntymaqtastyqqa basa mán beremiz. Strategııalyq seriktestik qaǵıdattaryna negizdelgen tájik-qazaq qatynastarynyń barlyq baǵytyn dáıekti túrde damytýǵa nıettimiz. Búgin biz tarıhı qujatty – Odaqtastyq ózara is-qımyl týraly deklarasııany qabyldaımyz. Bul qujat ekijaqty baılanystardyń irgetasyn aıtarlyqtaı nyǵaıta túsedi. Dıplomatııalyq qatynastar ornaǵan otyz jylda biz yntymaqtastyqtyń barlyq salasynda eleýli tabysqa qol jetkizdik. Joǵary deńgeıdegi turaqty saıası dıalog bul úderiske yqpal etetini sózsiz. Osy ýaqyt aralyǵynda memleketaralyq yntymaqtastyqtyń qajetti tetikteri jasaldy jáne aýqymdy quqyqtyq baza qalyptasty. Biz ony búgin jańa qujattar toptamasymen tolyqtyramyz. Saýda-ekonomıkalyq baılanystar bizdiń qarym-qatynasymyzdyń mańyzdy bóligi sanalady. Qazaqstan birneshe jyldan beri Tájikstannyń syrtqy saýda qurylymynda jetekshi orynǵa ıe», dedi Tájikstan Prezıdenti.
Emomalı Rahmonnyń aıtýynsha, ótken jyly eki el arasyndaǵy taýar aınalymy shamamen 1,5 mıllıard dollarǵa jetip, 20 paıyzǵa artty. Al búgin Qazaqstan Tájikstannyń saýda seriktesteriniń arasynda ekinshi orynda tur.
«Qurmetti Qasym-Jomart Kemeluly, Sizdiń Tájikstanǵa resmı saparyńyz barysynda jyl saıynǵy taýar aınalymyn aldaǵy ýaqytta 2 mıllıard dollarǵa jetkizý jóninde ýaǵdalastyq. Bul mindettiń josparly túrde júzege asyrylyp kele jatqany qýantady. Byltyr eki el arasyndaǵy taýar aınalymy shamamen 1,5 mıllıard dollarǵa jetip, 20 paıyzǵa artty. Búginde Qazaqstan Tájikstannyń saýda seriktesteriniń arasynda ekinshi orynda tur. Astanaǵa saparymnyń qarsańynda biz ekonomıkalyq sıpattaǵy birqatar is-shara ótkizdik. Úkimetaralyq komıssııa otyrysynyń, Iskerlik keńestiń jáne tájik-qazaq bıznes-forýmynyń nátıjeleri saýda-ekonomıkalyq baılanystarymyzdy qarqyndy túrde ilgeriletýge yqpal etedi dep senemin», dedi Tájikstan Prezıdenti.
