Aksııanyń tarıhyna az-kem toqtalsaq, parkter sherýi aryda, 1840 jyly saıasatker, botanık Dj.Sterlıng Mortonnyń AQSh-tyń Nebraska shtatyna qonys aýdarǵan shaǵynda bastalǵan desedi. Sonymen ol jańa qonysynyń aýlasynda turǵan jalǵyz túp aǵashty kórgen sátte áıelimen birge aǵash otyrǵyzyp, kógaldandyrý jumystaryna qyzý kirisipti. Keıin Sterlıng Morton Nebraska shtatyndaǵy merzimdi basylymnyń redaktoryna kóshet otyrǵyzý kúnin ótkizýdi usynypty. Bul bastamany shtat turǵyndary qoldap, á degennen mıllıonǵa shamalas aǵash otyrǵyzǵan eken. Osylaısha, úılesim tapqan aksııanyń izimen 1990 jyly «Parkter sherýi» halyqaralyq merekesi bastalǵan. Sol tusta parkter sherýine 141 elden 200 mıllıon adam qatysypty.
Aksııa aıasynda «Býrabaı» ulttyq parkiniń qyzmetkerleri orman qustaryna 98 úıshik ornatyp, ózen-kólderdiń jaǵasyna jasandy 52 uıa salǵan. Aıta keterligi, dúnıejúzilik «Parkter sherýi» aksııasy tek Býrabaıda emes, el aýmaǵyndaǵy ózge de Memlekettik tabıǵı qoryqtar, ulttyq parkter men tabıǵı rezervattarda qatar ótedi. Osy aksııa barysynda orman ınspektorlary halyqtyń qorshaǵan orta týraly tanym kókjıegin keńeıtip, ekologııalyq bilim berýdi qolǵa alǵany da quptarlyq bastama bolǵan. Aksııa aıasynda mektep oqýshylary men kolledj stýdentteri arasynda tabıǵatty qorǵaý taqyrybynda qyzyqty vıktorınalar ótip jatyr. Jastar men balalar qoryqshylar jumysynyń qyzyǵy men qıyndyǵy jaıly áńgimelerdi de yqylaspen tyńdaıtynyn park qyzmetkerleri de jaqsy biledi.
Endi park qyzmetkerleri Býrabaı mańyndaǵy jergilikti halyqty ekologııalyq senbilikke shaqyrýdy josparlap otyr. Sol sekildi sýretkerlik qyrynan tanylyp júrgen jas qylqalam sheberleri arasynda tabıǵat taqyrybynda sýret salýdan baıqaý ótedi eken. Qysqasy, qorshaǵan ortany qorǵaýǵa úndeıtin is-sharalar legi úzilmeı, úsh aıǵa ulasady. Bul bir jaǵy erekshe qorǵalatyn tabıǵı aýmaqtardyń ózekti máselelerine qoǵam nazaryn aýdarýǵa septesedi.
