Ulylar eline saıahat
Nazarbaev ýnıversıtetinde seksenge jýyq stýdenttik klýb jumys isteıdi. Solardyń biri – «Qazaq sahnasy» klýby. Ol qazaq tilin, qazaq halqynyń ulttyq qundylyqtaryn, qazaq ádebıeti men mádenıetin, ónerin dáriptep, nasıhattaıdy. Klýbtyń dúnıege kelgenine tórt-aq jyl boldy. Osy az-aq ýaqyt ishinde jańa otaý úsh úlken qoıylym daıyndap, sahnaǵa shyǵardy. Olar: ataqty rejısser, ssenarıst, akter Sháken Aımanovtyń «Taqııaly perishte» komedııasy, Ázilhan Nurshaıyqovtyń 100 jyldyq mereıtoıyna oraılastyrylyp daıyndalǵan «Mahabbat, qyzyq mol jyldar» spektakli (ssenarıılerin stýdentterdiń ózderi jazǵan) jáne Ilııas Esenberlınniń «Ǵashyqtar» povesinen sahnalyq qoıylym. «Mahabbat, qyzyq mol jyldar» spektakli 17 aqpanda Astanadaǵy L.N.Gýmılev atyndaǵy Eýrazııa ulttyq ýnıversıtetinde de kórsetildi.
Stýdentterdiń ónerdegi eńbekterin baǵalaǵan ýnıversıtet ákimshiligi olardyń ótinishterin jerde qaldyrmaı, 34 stýdentti sáýirdiń basynda Abaı oblysynyń ortalyǵy – Semeı qalasyna ári qaraı ulylar dúnıege kelgen Jıdebaıǵa aparyp keldi. Ýnıversıtet prezıdenti Shıgeo Katsý men oqytýshylar stýdenttermen birge baryp, uly Abaıdyń, Shákárimniń basyna zııarat jasady, Jıdebaıdaǵy Abaıdyń úı-murajaıyn, Bórlidegi Muhtar Áýezovtiń úı-murajaıyn, Semeıdegi Abaı mýzeıi men Tarıhı-ólketaný mýzeıin aralap kórdi.
Prezıdent Qasym-Jomart Toqaevtyń «Abaıdy Qazaqstan brendine aınaldyrý kerek» degen bastamasynyń oryndalatynyna osy sapar kózimizdi jetkizgendeı boldy. Bul sapardyń áli de jalǵasatynyna senemiz. Jastardy Qazaqstannyń kıeli jerlerine aparyp, el tarıhyna, jer tarıhyna súıispenshilikterin oıata bilsek, olar osy eldiń ıesi ózderi ekendikterin de anyq sezinetin bolady. Sonymen qatar Qazaqstan ýnıversıtetteri stýdentteriniń yntymaqtastyq qarym-qatynasyn ornatýdy da oılastyrǵan durys. Sonda Jańa Qazaqstandaǵy jańa oıly azamattardyń birligi, dostyǵy qalyptasady.
Lázzat ShATAEVA,
Nazarbaev ýnıversıtettiń baspasóz hatshysy
ASTANA
Ardagerler ortalyǵyndaǵy kezdesý
Jaqynda Astana qalasyndaǵy «Belsendi uzaq ómir súrý» ortalyǵynda jazýshy Ádilbek Ybyraıymulymen kezdesý ótti. Bizge kúni buryn osy avtordyń «Semser júzindegi sert» dep atalatyn úshtomdyq romany talqylanatyny habardar etildi. Sodan kitaphanaǵa baryp, kitappen tanysyp, 3 tomyn da oqyp shyqtym.
Bul Kenesary hannyń barlyq ómir jolyn, maqsatyn aıqyn, túsinikti tilmen sýrettegen shyǵarma eken. Romannyń 1-tomy «Arlannyń azýy», 2-tomy «Sert», 3-tomy «Rýh» dep atalýynyń ózinde úlken mán jatyr. Ony avtordyń ózi baıypty, túsinikti tilde jetkize bildi.
Kezdesýge qatysqan jýrnalıst, ádebıettanýshy Saǵyndyq Nurekeev óskeleń urpaqqa osy kitap boıynsha fılm túsirse, kópshilik jaqsy qabyldar edi degen usynys aıtty. Al kezdesýde joǵary sanatty dáriger Serik Oral ózderiniń arǵy babalarynan qalǵan hattyń kóshirmesin avtorǵa usynǵanyn jetkizdi. Onyń babalary Kenesary bastaǵan sarbazdar jeńiliske ushyrap, qıyndyqqa tap boǵan kezde olarǵa tamaq tasyp beripti.
Kezdesýde qatysýshylar avtorǵa suraq qoıyp, tıisti jaýaptaryn aldy. Is-sharada sóılegenderdiń barlyǵy kesh ıesine densaýlyq pen shyǵarmashylyq tabys tiledi. «Belsendi uzaq ómir súrý» ortalyǵynyń dırektory Muhtar Erketaev ortalyqtyń atynan eskertkish syılyq tapsyrdy.
Is-sharany uıymdastyrǵandarǵa, onyń ishinde ásirese Lázzat Dúısebaıqyzyna, sondaı-aq zeınetkerlerge qamqorlyq kórsetip, ortalyq ashyp bergen qalalyq ákimdiktegi azamattarǵa alǵystan basqa aıtarymyz joq.
Kúlásh ShÚRENOVA,
ardager ustaz, Qazaqstan Respýblıkasy bilim berý isiniń úzdigi
ASTANA
Erekshe balalar kolledjde oqıdy
Semeı qalasyndaǵy polıtehnıkalyq kolledjde oblys kolledjderi arasynda alǵash ret semınar uıymdastyryldy. Al polıtehnıkalyq kolledjde 90-nan astam bala turaqty túrde bilim alyp, qıyn mamandyqtardy meńgerip júr. Abaı oblystyq bilim basqarmasy basshysynyń orynbasary Ásem Núskenova semınardaǵy sózinde erekshe balalar ózderin qoǵamnyń bir múshesi retinde tolyqqandy sezinýleri jáne kedergisiz túrde mamandyq alýlary kerek dep sanaıtynyn aıtty.
– Búgin biz alǵash ret óte mańyzdy ári ózekti semınar ótkizip otyrmyz. О́ıtkeni erekshe balalar kóńil bólýdi, áleýmettik qorǵaýdy jáne aıryqsha tehnıkalyq jabdyqty qajet etedi. Oblysta ártúrli sanattaǵy múmkindigi shekteýli balalar oqıtyn bes mektep-ınternat bar. Biz múmkindigi shekteýli balalardy shetke teppeı, kerisinshe, ózderin qoǵamnyń tolyqqandy múshesi retinde sezinýlerine kómektesýimiz kerek. Bul balalar ózderiniń bizge qanshalyqty qajet ekenin sezinýleri tıis, – dedi Á. Núskenova.
Polıtehnıkalyq kolledj dırektorynyń oqý-óndiristik jumys jónindegi orynbasary Baıan Oljabaeva mundaı balalarmen jumys isteý ońaı emes ekenin, biraq muǵalimderdiń barlyǵy da nátıjege umtylyp, bar kúsh-jigerin salýǵa tyrysatynyn aıtty.
– Qazir bizde ártúrli mamandyqtar boıynsha 10-nan astam top bar, olarda erekshe balalar oqytylady. Olarmen jumys isteý ońaı emes, biraq muǵalimder sabaqty joǵary deńgeıde ótkizýge baryn salady. Osy maqsatta biz biliktilikti arttyrý kýrstarynan óttik, daıyndaldyq, – dedi B.Oljabaeva.
Polıtehnıkalyq kolledj oblystaǵy basqa barlyq kolledjge erekshe balalardy oqytýǵa ábden bolatynyn dáleldep berip otyr. Buryndary tek mektepte ǵana oqytýǵa bolady dep tanylǵan balalar endi bir baspaldaq ilgerilep, kolledjde bir kásip meńgerip shyǵady. Semınar barysynda ustazdar taqyrypqa qatysty máselelerdi talqylap, ózara tájirıbe almasty.
Raýshan QABJANQYZY
SEMEI
