Aıgúl Nabıeva Pavlodar qalasynda ómirlik serigin keziktirip, turmys qurǵan soń, kóp uzamaı 2001 jyly kóz qýanyshy tuńǵyshy dúnıege kelgen. Bala sap-saý. Qandaı da bir ereksheligi baıqalmaǵan. Segiz aıynda qorbańdap júre bastapty. Sodan bir kún jas otbasy tuńǵyshynyń aýyryp, mazasyzdana bastaǵanyn ańǵaryp, jedel járdem shaqyrady. Keıin bala jan saqtaý bólimine túsip, jas otbasy náresteden kóz jazyp qalady. Taǵdyrdyń basqa salǵan taýqymetine kónbeske amal joq. Osyny túsingen jas otbasy ekinshi perzentin dúnıege ákelýdi oılastyrady. Dárigerge qaralyp, biraz emdelgennen keıin, jigeri jasymaǵan otbasynda ekinshi ul dúnıege esigin ashqan. Týǵanda náresteniń salmaǵy 4 800 gramm bolypty. Araǵa birer kún salyp, dárigerler balanyń júreginde aqaý baryn anyqtaǵan.
– Dárigerlerdiń ekinshimizdiń júreginde aqaý bar degeni bizge aýyr tıgen habardyń tek basy ǵana ekenin keıin bildik. Tuńǵyshymyzdan kóz jazyp qalǵannan keıin men ózimdi basqara almaı, depressııaǵa túskenmin. Bálkim, bul ekinshi balamyzǵa áser etken bolar dep oılaımyn qazir. Balamyz on eki kúnnen soń ınsýlt aldy. Pavlodardaǵy balalar reanımasııasyna bardyq. Sol kez balamdy emdep-jazamyn dep bekindim, bóten oı mazalamady. Bir aı aýrýhanada boldyq. Insýltten keıin balamdy baýyryma alǵanda oǵash qımyldap, jan daýysymen aıqaıǵa basatyndy shyǵarǵanyn bildim. Jaǵdaıdy túsingem joq. Basym qatty. Sol sáttegi ahýalymdy qazir sózben aıtyp jetkize almaımyn. О́zimdi-ózim jigerlendirip, balamdy qalaı da saýyqtyryp alsam degen oı maza bermedi. Alty aıdan soń Reseıdiń Omsk qalasyna bardyq. Buryn balamyz basyn kótere almasa, Omskige bes ret qatynaǵannan keıin ony qozǵalta bastady. Elde meıirban jandar kóp qoı, qol úshin sozǵan aǵaıynǵa alǵys aıtamyn, – deıdi Aıgúl Nabıeva.
Em sharalardan keıin dárigerler balaǵa «Sındrom Lennoksa-Gasto» dıagnozyn qoıǵan. Bul – ádette balalarda jıi kezdesetin epılepsııanyń kúrdeli túri sanalady. Sondyqtan nevrologtar erekshe balanyń dertten aıyǵýy ekitalaı ekenin eskertken. Erekshe balalar tárbıelenetin ınternatqa tapsyrýdy suraǵan. «Ana kesimi aınymaıdy» emes pe? Aıgúl balasyn ózi asyraýǵa bel baılaǵan. Ol erekshe jandardyń sezý, estý, kórý qabileti arqyly mán-jaıdy túsinetinin bilgen. Ýaqyt sátimen Aıgúl Nabıeva áleýmettik jelide epılepsııaǵa shaldyqqan balalardyń ata-anasy birikken toptarǵa qosylyp, keńesip otyrýǵa daǵdylanǵan. Meıirban ana balasyn baýyryna basqannan keıin alǵashqy 5 jyl qınalǵanymen, qazir úırenip qalǵanyn aıtady.
– Buryn-sońdy erekshe balanyń kútimi qandaı bolatynyn kórmegender úrke qaraıdy. Biz úırendik. Úırengen soń da tańerteń, keshke balam uıyqtap jatqanda bir mezgil qoldan keletin jumystarǵa shyǵyp júrmin. Ekibastuzdan Astanaǵa balamnyń em shara alýyna jaǵdaı jasap, ózim jumysqa ornalasý úshin keldim. Páter jaldap turamyz. Janashyr kúıeýim de ómirden ótti. Onyń zeınetaqy qoryndaǵy qarjysyn bala 18-ge tolmaǵansha ala almaımyz. Qıyny, úı kezegine turý úshin zań boıynsha kemi úsh jyl kútedi ekenbiz. Meniń kelgenime bir jarym jyldan mine-mine asyp barady. Bizdiń barmaǵan jerimiz, baspaǵan taýymyz qalmady. Qazir ózim jumys istep tapqan-taıanǵanyma, kómek qolyn sozǵan jandardyń qarjysyn qosyp, dári-dármekti Germanııadan alyp otyrmyz. Osy kúnge deıin elden kómek suraǵanym joq. Endi qaıyrymdylyq qorlaryna júginýdi oılap otyrmyn, – deıdi ana kúrsinip.
Elordaǵa qulynynyń qamy úshin qonys aýdarǵan Aıgúl Nabıeva perzentiniń densaýlyǵyna alańdaýly. Al ana men balanyń ortaq armany – páter kezegine turyp, qalaı da úıli bolý.
