Rásim kezinde úrmeli orkestrdiń oryndaýynda saltanatty marsh oryndaldy. Eskertkishke gúl qoıý rásimi bir mınýt únsizdikpen bastaldy.
«9 mamyrdyń tól tarıhymyzdaǵy orny erekshe. Bul – janqııarlyqpen el qorǵaǵan atalarymyz ben ákelerimizdiń, ájelerimiz ben analarymyzdyń rýhyna taǵzym etetin kún. Osydan 78 jyl buryn qandy maıdan aıaqtalyp, jeńis týraly jańalyq kelgen kún. Eldiń azattyǵy men urpaqtyń jarqyn bolashaǵy úshin janyn pıda etken bozdaqtarymyzdy máńgi esimizde saqtaý – qasıetti boryshymyz», dedi Saryarqa aýdany ákiminiń orynbasary Medet Jalpybaev.
Is-sharada tyl eńbekkerleri men Aýǵanstan soǵysynyń ardagerleri gúl shoqtaryn qoıyp, qaza bolǵandardy eske aldy.
«Biz sol qaısar, batyr urpaqtyń jalǵasy retinde soǵysta qaza tapqan árbir maıdangerdiń rýhy aldynda taǵzym etemiz», dedi Aýǵanstan soǵysynyń ardageri Ǵalym Qojabekov.
«Sheıh Kýnta qajy» meshitiniń ımamy Danııar Baıdýllaev quran oqyp, Orys Pravoslav shirkeýiniń dinı qyzmetkeri Arhımandrıt Ioasaf alǵys sózderin, quttyqtaýlaryn aıtyp, densaýlyq, beıbitshilik pen jaqsylyq tiledi.
