Baıqaý synaǵy oqýǵa túsýshilerge UBT-ǵa daıyndalýǵa kómek retinde ázirlendi.
Talapkerlerge UTO saıtynda https://prob-ent.testcenter.kz/ siltemesi boıynsha tegin onlaın testileýden ótý múmkindigi qarastyrylǵan. Ol úshin testilenýshilerge tek JSN terip, beıindik pánderdiń kombınasııasyn tańdap, baıqaý synaǵyna kirisý qajet.
«Oqý jylynyń basynan bastap tegin onlaın testileý 1,5 mln ret tapsyrylǵan. Atap ótsem, bul jattyǵý testin biz qazan aıynda iske qosyp, jeltoqsanda suraqtar bazasyn jańartqan edik. Osy joly balalardyń mańyzdy emtıhanǵa daıyndyǵyn jaqsartý úshin taǵy da birneshe nusqa qosý týraly sheshim qabyldadyq», dep atap ótti QR ǴJBM Ulttyq testileý ortalyǵynyń dırektory Rýslan Emelbaev.
Eske sala ketsek, 14 mamyrǵa deıin negizgi UBT-ǵa ótinish qabyldaý júrgizilýde. Testileýdiń ózi 16 mamyr men 5 shilde aralyǵynda ótedi. Talapkerler UBT-ny 2 ret tapsyryp, eń jaqsy nátıjemen grant konkýrsyna qatysa alady.
Talapkerlerdiń negizgi UBT-ǵa daıyndyǵyn jaqsartý maqsatynda ótken jyly ár pán boıynsha jeke taqyryptyq taldaý engizildi. Iаǵnı, ár UBT-dan keıin (qańtar, naýryz) túlekterge jeke taqyryptar boıynsha bilimderin arttyrý usynylady. Sonymen qatar, negizgi UBT-nyń birinshi múmkindigin tapsyrǵannan keıin olar ekinshi múmkindikke deıin daıyndyqtaryn jaqsarta alady.
«Bilim berý ortalyqtarymen birlesip, tegin onlaın sabaqtardy jalǵastyrdyq. Al oqý jylynyń basynda UTO saıtynda test tapsyrmalary qurastyrylǵan ádebıetter tizimi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarııalandy. Daıyndyq sapasyn jaqsartý úshin osy jáne basqa da qabyldanǵan sharalar túlekterimizge testileýde joǵary nátıje kórsetýge kómektesedi dep úmittenemiz», dedi Rýslan Emelbaev.
