Is-sharaǵa Parlament Májilisiniń depýtaty Dáýlet Turlyhanov, Qorǵanys mınıstriniń orynbasary Sultan Qamaletdınov, «Amanat» partııasynyń hatshysy Dáýlet Káribek jáne qarýly kúshterdiń ardagerleri, tanymal sportshylar qatysty.
– Júreginde otanshyldyq rýhy jalyndaǵan jastardyń jańa býyny ósip kele jatqanyna bárimiz kýámiz. Táýelsizdigimizdi nyǵaıtyp, elimizdi odan ári órkendetý qazirgi urpaqtyń qasıetti boryshy. Dástúrge aınalyp kele jatqan «Qaisar» áskerı-patrıottyq oıyndary – otanshyl jastardy adal qyzmet etýge, el qorǵany bolýǵa tárbıeleıtin biregeı alań. Byltyr irikteý kezeńine 1 700-ge jýyq jas azamat qatysqan bolsa, bıyl qatysýshylar sany 3 myńnan asty, – dedi jıynda «Amanat» partııasynyń hatshysy Dáýlet Káribek.
Jalpy, partııanyń jastar qanaty bul jobany iske qosatynyn byltyr «Amanat»-tyń kezekten tys XXII sezinde málimdegen edi. Bıyl, mine, ekinshi márte aımaqtarda 15-25 sáýir aralyǵynda irikteý júrgizildi. Bul jolǵy oıyn burynǵydan ózgerek. Is-sharada desanttyq-shabýyldaý áskerleri soǵystaǵy urys barysyn beıneleıtin kórinis qoıdy. Al álemge tanymal atlet Sergeı Syrýlnıkov jastardyń aldynda óz kúshin kórsetip, jınalǵan kópshilikti tánti etti. Jıylǵandar tilek aıtyp, ardagerler aq batasyn berdi.
– El qorǵaý – qasıetti borysh. Biz aqyldy, sabyrly, sanasy sergek, oıy ushqyr jastarǵa qarap súısinemiz. Árdaıym qaısar, ójet, alǵyr bolyńdar. Ata-babadan amanat bolyp qalǵan atamekenimizdi qorǵaı bilińder. Abyroılaryń aspandaı bersin, – dedi Qarýly kúshter ardageri, kontr-admıral Ratmır Komratov.
Eki kúnge jalǵasqan básekede fınalıster qataryna iligý úshin qatań irikteýden ótti. Nátıjesinde, sheshýshi saıysqa 120 qatysýshy joldama aldy. Olar qashyqtyqqa júgirip, arnaıy áskerı jattyqtyrýshylar daıyndaǵan kedergilermen júrip synaldy. Sonymen qatar saptyq daıyndyq deńgeıleri kórsetilip, «Meniń elim – Qazaqstan» atty áskerı-tanymdyq vıktorınada bilimderin shyńdady.
– Elimizdiń túkpir-túkpirinen júzden júırik, myńnan tulpar jastar jınaldy. Sizder óz óńirlerińizde qatardan qara úzip, búgingi sońǵy kezeńge joldama alyp keldińizder. Al endi elorda tórinde jeńiske jetý úshin osyǵan deıin jıǵan bilim-bilikterińizdi, dara daǵdylaryńyzdy, tózimderińizdi tanytasyzdar degen oıdamyn. Tipti, aralaryńyzda bolashaq Otan qorǵaýshylar, serjanttar men ofıserler turǵanyna senimdimin, – dedi Qorǵanys mınıstriniń orynbasary Sultan Qamaletdınov.
Saıys qorytyndysy boıynsha, Túrkistan oblysynyń komandasy júldeli birinshi oryndy ıelense, Qaraǵandy oblysynyń oqýshylary ekinshi oryndy qanjyǵasyna baılady. Al úshinshi oryndy Almaty qalasynyń komandasy mise tutty. Uıymdastyrýshylar ár óńirdiń úkilegen úmitin arqalaǵan órenderge baǵaly syı-sııapattar tabystady.
– Jastar – egemen elimizdiń bolashaǵy. Sondyqtan bul is-shara bárimiz úshin mańyzdy. Árqaısyńyz tárbıeli, bilimdi, mádenıetti, namysty azamat bolyp ósip kele jatqandaryńyzǵa senimdimin. О́mirlerińizde asyqtaryńyz únemi alshysynan túsýin tileımin. Osy oraıda, «Amanat» partııasyna jáne bul is-sharanyń ótýine atsalysqan azamattardyń bárine alǵysymdy bildiremin. Elimiz aman, jurtymyz tynysh bolǵaı, – dedi Májilis depýtaty Dáýlet Turlyhanov.
Al Túrkistan oblysynan kelgen komandanyń múshesi Stas Grachev bul jeńis ońaılyqpen kelmegenin, alaıda osy ýaqyt aralyǵynda balalar jańa dos tapqanyn aıtty.
