Kitap orys jáne qazaq tilderinde Etage dızaın stýdııasy men «Shevron» kompanııasynyń qoldaýymen jaryq kórgen. Kitaptyń maqsaty - Qazaqstannnyń tabıǵat baılyǵyn, qaıtalanbas sulýlyǵyn, ár ólkenin jergilikti mádenıeti dástúrlerin kishkentaı oqyrmandarǵa tanystyrý jáne dáripteý. Onda balalar ádebıetinde qalam terbep júrgen jas jazýshylardyń áńgimeleri toptastyrylǵan. Ár shyǵarmanyń sıýjeti balalardy ózine eltip, atamekenimizdiń ártarapyna saıahat jasaýǵa, týǵan jerdiń syry men jyryn, tylsym qupııasy men tarıhyn bilýge jeteleıdi.
Kitap kishkentaı oqyrmandardyń kóńilinen shyǵyp úlgerdi deýge bolady. О́ıtkeni, qazaq tilinde shyqqan kitaptyń basym bóligi satylyp ketken.
«Qýyrshaq» teatrynda ótken tanystyrylymǵa Tolymbek Ábdiraıym, Záýre Tórehan, Serikbol Hasan syndy balalar jazýshylary men aqyndary, Darhan Myńbaı, Aıgúl Múkeı jáne basqa da qoǵam qaıratkerleri men medıa-tulǵalar, jýrnalıster men blogerler, sondaı-aq atalmysh joba men kitap avtorlary, «Shevron» kompanııasynyń ókilderi qatysyp, balalar ádebıeti tóńireginde pikir almasty. Avtorlar joba tarıhy men ony júzege asyrý barysy týraly aıtyp, áriptesteriniń saýaldaryna jaýap berdi.
«Bizdiń ınvestısııalarymyz munaı-gaz óndirisimen ǵana shektelmeıdi. «Shevron» kompanııasynyń áleýmettik ınvestısııalary qazaqstandyqtardyń sapaly bilim alý, densaýlyq saqtaý múmkindikterin keńeıtip, jastarǵa kásipkerlik pen ınnovasııa salasynda búginnen bastap jaǵdaı jasaıdy. Búgin seriktesterimizben birge maqtanyshpen usynyp otyrǵan kitabymyz jas qazaqstandyqtardyń oqýǵa qushtarlyǵyn arttyryp, sonymen qatar, qorshaǵan álemge qyzyǵýshylyq tanytyp, izdenimpaz bolyp ósýine jaǵymdy yqpalyn tıgizedi dep senemiz. Bul memleket bolashaǵy úshin de óte mańyzdy. Balaqaılar ár óńirdiń tylsym qupııalaryn osy kitaptan tabady dep oılaımyz. Bul kitap kópshilikke jetsin degen maqsatpen kitaphanalarǵa taratamyz», dedi Erkin Zikibaev.
Aıta ketsek, bul kitapqa balalar jazýshysy Nuraına Satpaevanyń áńgimeleri engen. Ol álemdegi ónertabystyń kóbi tabıǵattyń týyndysyna qarap shyǵarylǵanyn atap ótip, balalar úshin tabıǵatty taný mańyzdy ekenin jetkizdi.
Sonymen qatar, is-sharaǵa Darhan Myńbaı arnaıy qatysyp, quttyqtaý sóz sóıledi.
«Balalarǵa arnalǵan kez-kelgen kitapty qýanyshpen qabyldaýymyz kerek. Eresekterge arnalǵan kitaptarǵa qaraǵanda balalar ádebıetin qyzyǵyraq qylyp jazý kerek. Búginde ıllıýstrasııa jasaıtyn mamandar az. Al ıllıýstrasııasyz kitap - kitap emes. Balalarǵa arnalǵan týyndynyń paıdasy ózimizge birneshe ese bolyp qaıtady», dedi ol.
Al Tolymbek Ábdiraıym balalarǵa arnalǵan kitaptardy qazaq tilinde shyǵarýdyń mańyzyn atap ótip, osyndaı kitaptardy ár ólkege arnap, jeke-jeke serııa qylyp shyǵarýdy usyndy. Jazýshy bul kitapty oqyǵan balalar bolashaqta mindetti túrde týǵan jerdiń tabıǵatyn tanýǵa talpynatyn bolady dedi.
Is-sharanyń ekinshi bóligi kishkentaı oqyrmandardyń qatysýymen jalǵasty. Onyń barysynda kitap avtorlarynyń biri Nuraına Sátpaeva baldyrǵandarǵa óz hıkaıatyn oqyp berse, «Qýyrshaq» teatrynyń ártisteri kitapqa kirgen shyǵarma negizinde daıyndaǵan shaǵyn qoıylymyn kórsetti. Al uıymdastyrýshylar teatrǵa kelgen barlyq balaǵa basylymnyń bir-bir danasyn tartý etti. Bir aıta keterligi, jańa kitaptyń satylymǵa shyqpaǵandary kópshilikke qoljetimdi bolýy úshin elimizdiń iri kitaphanalaryna, galereıalary men mádenı ortalyqtaryna tegin taratylǵan.
