100 otbasyna – tegin gaz

Astana ákimdigi «Halyk Bank»-pen birlesip, Almaty jáne Saryarqa aýdandaryndaǵy 100 jeke úıdi tegin gazdandyrý týraly memorandýmǵa qol qoıdy. Jalpy, bıýdjeti 230 mln teńgeni qamtıtyn gazdandyrý jobasy «Halyk»-tyń 100 jyldyǵyna arnalǵan «100 ıgi is» aýqymdy naýqany aıasynda iske asyrylyp ja­tyr. Bıyl «Halyk Bank» qarajaty esebinen muqtaj otbasylar turatyn 230-ǵa jýyq turǵyn úıdi, dálirek aıtqanda, Astanadaǵy 100 úıdi jáne Almaty qalasynyń Naýryzbaı, Alataý jáne Medeý aýdandarynda turatyn 130 úıdi gazǵa tolyqtaı qo­­sý úshin qarjylandyrý josparla­nyp otyr.

«Astana qalasyndaǵy Almaty jáne Saryarqa aýdandarynda gazǵa qoljetimdilik tolyq qamtamasyz etilgen. Bul – shamamen 12 myń abonent. Onyń ishinde 8 myńnan asa abonent gazǵa qosyldy. Úılerdi gazǵa qosý shyǵyndaryn azaıtý úshin júıeli jumys júrgizip jatyrmyz. Halyqtyń áleýmettik osal toptary úshin 450 myń teńgege jýyq somaǵa gazdandyrý shyǵyndaryna ótemaqy kózdelgen, sondaı-aq quny 150 myń teńgege jýyq esepteý quraldary tegin beriledi. Buryn bankpen paıyzsyz nesıeleý baǵdarlamasy iske qosylǵan edi. Endi «Halyk»-pen elordadaǵy 100 úıdi tegin gazdandyrý jobasyn iske asyrýǵa kirisemiz. Qalǵan aýdandar boıynsha gaz qubyryn jetkizý jelilerin, oramishilik jelilerdi salý jumystary kelesi jyly júrgiziledi. Gazdandyrý úderisi – Memleket bas­shy­synyń baqylaýynda», dedi Astana ákimi Jeńis Qasymbek.

Qazirgi ýaqytta elorda ákimshiligi áleý­met­tik osal sanatyna jatatyn muqtaj adam­dardyń tizimin usyndy. Olarǵa mate­rıal­dyq jaǵdaıy gazdandyrýdy óz betinshe tóleýge múmkindigi joq turǵyndar engizildi.

Banktiń basqarma tóraǵasy Úmit Shaıahmetovanyń aıtýynsha, «Halyk» birneshe jyl boıy gazdandyrý máse­lesin sheshýge óz re­sýrs­taryn salyp jatyr.

«Biz azamattardyń ómir súrý sapasyn arttyrý úshin banktik qyz­met­terin jetildirý búkil respýblıka boıynsha áleýmettik jobalardy iske asyrý arqyly da únemi óz úlesimizdi qosyp kelemiz. 2021 jyly bank Almatyda jalpy somasy 92 mln teńgege 100 jeke úıdi tolyqtaı gazdandyrýdy qarjylandyrdy, sondaı-aq turǵyn úılerge gaz júr­gizýge jeńildikpen nesıe berýdiń jeke baǵdarlamasyn iske qosty. Bank turǵyn úılerge gaz júr­gi­zýge je­­ńil­dikpen nesıe berýdiń jeke baǵ­dar­la­masyn iske qosty. Gazdandyrý jobasyn jalǵastyra jáne keńeıte otyryp, biz birden eki mindetti – otandastarymyzdyń neǵurlym osal toptaryna kómektesýge jáne eldegi ekologııalyq jaǵdaıdy jaqsartýǵa barynsha járdemdesýge tyrysamyz», dedi Ú.Shaıahmetova.