«Qalada 14 mekteptiń qurylysy júrip jatyr, onyń 11-in kelesi oqý jylynda ashýdy josparlap otyrmyz. Birqatar mekteptiń qurylys barysymen tanystym. Olar Qarasaı batyr men Bulanty kósheleriniń qıylysynda, Kókseńgir kóshesiniń boıynda, Uly dala dańǵyly men Saýran kóshesiniń qıylysynda, Turan dańǵylynyń boıynda, Turan dańǵyly men №24 kóshesiniń qıylysynda ornalasqan», dedi qala ákimi.
Onyń aıtýynsha, Qarasaı batyr men Bulanty kósheleriniń qıylysyndaǵy bilim ordasy 87 jyl buryn salynǵan eski mektepti almastyrýǵa múmkindik beredi. Jańa oqý orny eki aýysymda 2 400 oqýshy ornyna shaqtalady.
Sol sııaqty Kókseńgir kóshesindegi (Kırpıchnyı eldi mekeni) mektep te osyǵan deıin apatty jaǵdaıda dep tanylǵan. Qazir bul mekteptiń ornynda jańa oqý ornynyń qurylysy júrip jatyr. Bul eldi mekende budan basqa mektep joq. Sol sebepti oqýshylar ózge aýdandarǵa qatynap oqıdy.
Al Turan dańǵyly men №24 kóshesiniń qıylysyndaǵy jáne Uly dala dańǵyly men Saýran kóshesiniń qıylysyndaǵy bilim oshaqtary №85 mektep-lıseıiniń jáne №89 mektep-lıseıiniń úsh aýysymdy problemasyn sheshýge múmkindik beredi. Bul mektepterdiń árqaısysy eki aýysymda 2 400 oqýshyǵa arnalǵan.
«Buǵan qosa Memleket basshysynyń tapsyrmasy boıynsha aldaǵy eki jylda Astanada «Jaıly mektep» jobasy aıasynda 24 mektep salynady. Bul nysandardyń barlyǵy qolaıly, qaýipsiz, «aqyldy» qalanyń qaǵıdatyna sáıkes bilim berý sapasyn arttyrýǵa, adam kapıtalyn damytýǵa oń áser etedi dep oılaımyz», dedi J.Qasymbek.
