Týrnırdiń ashylýyna QR Mádenıet jáne sport mınıstri Ashat Oralov, Astana qalasy ákiminiń orynbasary Erlan Bekmýrzaev, Qazaqstan áıelder, grek-rım jáne erkin kúres federasııasynyń prezıdenti, QR Parlament Májilisiniń depýtaty Dáýlet Turlyhanov, Jaqsylyq Úshkempirovtiń ómirdegi aǵasy Sát Toqpaqbaev qatysyp, quttyqtaý sóz sóıledi.
Astana qalasy ákiminiń orynbasary Erlan Bekmýrzaev jarys qatysýshylaryna sáttilik tileı otyryp, aldaǵy ýaqytta da osyndaı týrnırler jıi ótetindigin aıtty.
«Barshańyzdy Olımpıada jeńimpazy, Qazaqstannyń eńbek eri, Jaqsylyq Úshkempirovti eske alýǵa arnalǵan Halyqaralyq týrnırdiń ashylýymen quttyqtaımyn. Dańqty sportshy jahan jurtyna elimizdi tanytyp qana qoımaı, talaı qaıyrymdy isterimen este qaldy. Jastardy Otan súıgishtikke tárbıelep, týyp ósken aýyl-aımaǵyn kórkeıtýge atsalysty. Olımpıada chempıony Jaqsylyq Úshkempirov jastardyń sportqa bet burýyna kóp yqpal etti. Túrli halyqaralyq jarystardy uıymdastyryp, óskeleń urpaqtyń salaýatty ómir saltyn ustanyp, olardyń iri dodalarda top jarýy úshin de aıanbaı eńbek etti. Birtýar azamattyń júrgen joly, atqarǵan isi kópke úlgi. Halqymyzdyń birtýar perzentiniń esimin ulyqtap, eńbegin baǵalaý jolynda búgingideı is-sharanyń mańyzy zor ekendigin aıtqym keledi. Aldaǵy ýaqytta da dúbirli doda óz jalǵasyn tabatyn bolady. Baıraqty básekege qatysýshylarǵa sáttilik tileımin», dedi Erlan Bekmýrzaev.
Qatysýshylar sporttyq is-sharanyń ashylý saltanatynda Jaqsylyq Úshkempirovti bir mınýt únsizdikpen eske aldy.
Aldaǵy kúnderi elimizdiń ár óńirinen kelgen balýandarmen qatar Qyrǵyzstan, О́zbekstan Tájikstan, Ázerbaıjan jáne Izraıldiń úzdik 164 sportshysy ózara 10 salmaqta synǵa túsedi.
Alǵashqy kúngi beldesýden keıin fınalǵa shyqqan balýandar: 55 kg: Arsen Juma (Qazaqstan) - Aıbek Aıtbekov (Qazaqstan); 63 kg: Jantoro Mırzalıev (Qyrǵyz Respýblıkasy) - Damır Ibrashev (Qazaqstan); 72 kg: Rýslan Nýrýllaev (Ázirbaıjan) - Nurdáýlet Tursyn (Qazaqstan); 82 kg: Islam Evloev (Qazaqstan) - Ismaıl Rzaev (Ázirbaıjan); 97 kg: Nurtas Qydyrbaev (Qazaqstan) - Bahram Kýrbanov (Qyrǵyz Respýblıkasy). Búgin, osy salmaqtaǵy barlyq júldeger anyqtalady.
Astana tórinde 3-shi ret uıymdastyrylyp otyrǵan halyqaralyq týrnır mamyrdyń 18-ne deıin jalǵasady.
