Rybakına – Rım patshaıymy

Jarysty Elena ekin­shi aına­lymnan bastady. Al­ǵa­shyn­da WTA reıtınginde 64 orynda turǵan ıtalııalyq Iаsmıne Paolınıden 7:6, 6:1 esebimen basym tústi. Kóp keshikpeı úz­dikter tiziminde 57 satyǵa jaı­ǵasqan Anna Kalınskaıany qapy qaldyrdy. Birinshi sette jer­lesimiz 4:3 esebimen alǵa shyq­qan kezde Reseı oıynshysy básekeni jalǵastyrýdan bas tart­ty. Tórtinshi kezeńde Tokıo Olım­pıadasynyń kúmis júldegeri Marketa Vondroýshovamen sheberlik baıqasty. Bul kúnderi reıtıngte 65 oryndy qanaǵat tutyp otyrǵan chehııalyq tennısshi kezinde TOP-15-tiktiń qatarynda edi. Bul kezdesýde Rybakınanyń ústemdigi esh kúmán týǵyzǵan joq. Esep – 6:3, 6:3.

Shırek fınalda Elenanyń álem­niń birinshi raketkasy, 21 jastaǵy Iga Sventek kútip turdy. Polsha óki­liniń Rolan Gar­rostyń eki dúrkin jáne AQSh-tyń ashyq birinshiliginiń je­ńimpazy degen ataqtary bar. WTA týrnırlerinde ol 13 márte top jardy. Sońǵy eki jylda Iga dál osy týrnırde qarsylas shaq keltirmeı, bas júldeni oljalady. Buǵan deıin ekeýi úsh ret kezdesip, Aýstralııanyń ashyq birinshiligi men Indıan-Ýellstegi týrnır Rybkınanyń paıdasyna sheshildi. Bul joly da sol jaǵdaı qaıtalandy. Bi­rinshi sette polıak qyzy basym tústi – 6:2. Ekinshisi taı-breıkke deıin ulasyp, Rybakınanyń baǵy jandy – 7:6. Úshinshi sette tarazy basy teń­selip turdy. Esep 2:2-ge jetkende, Sven­­­tek jaraqatyn jeleý etip, kortqa shyq­pady.

Jartylaı fınalda Elena Ry­bakına óziniń attasy Elena Os­tapenkomen kúsh synasty. WTA reıtınginde 20 orynda tur­ǵan Latvııanyń tennısshisi ke­zinde Rolan Garrosta top jaryp, Ýımbldonnyń jartylaı fı­nalyna deıin jetken. Asa iri ha­lyqaralyq dodalarda 12 ret dara shyqty. Biraq qarqyny kún saıyn kúsheıip kele jatqan otan­dasymyzǵa Ostapenko bóget bola almady. Bul básekede Elena Baltyq jaǵalaýy ókilin 6:2, 6:4 esebimen eńserdi. Bir aıta keterligi, Rımdegi týrnırde aqtyq synǵa deıin alqynbaı jetken jerlesimiz amerıkalyq Monıka Selesh pen reseılik Marııa Sharapovanyń rekordyn qaıtalady. Attary ańyzǵa aınalǵan bul oıynshylar bir maýsymda tórt birdeı dú­birli dodanyń fınalynda óner kórsetken edi. Mine, endi Qazaq­stannyń maqtanyshy Aýstra­lııanyń ashyq birinshiligi men Indıan-Ýells, Maıamı jáne Rımdegi týrnırlerdiń bas júldesi úshin talasý mumkindigine ıe boldy.

Fınalda Rybakına Angelıne Kalınınamen kezdesti. 26 jastaǵy Ýkraınanyń ókili álemdik reıtıngte 47 oryndy ıelenýde. «Úlken dýlyǵa» sanatyndaǵy týrnırlerde ol úshinshi aınalymnan asyp kórmegen jáne WTA týrnırlerin bar-joǵy bir ret qana utqan. Soǵan qaramastan Rımde Dınara Sa­fınanyń shákirti Anna Blınkova (Reseı), Sofıa Kenın (AQSh), Medısson Kıs (AQSh), Beatrıs Haddad-Maııa (Brazılııa) jáne Veronıka Kýdermetova (Reseı) syndy tanymal tennısshilerdi tize búktirdi. Onyń ústine, ekeýi osyǵan deıin nebári bir márte ǵana kezdesip, sol tartys Kalınanyń paıdasyna sheshildi.

Fınaldyq saıys Elenanyń basymdyǵymen ótti. Birinshi set­te ol 6:4 esebimen jeńiske jet­ti. Ekinshisinde jerlesimiz 1:0 esebimen alǵa shyqqan edi, Kalı­nına «belim shoıyrylyp qaldy» dep básekeni jalǵastyrýdan bas tartty. Bul tartys nebári 1 saǵat 08 mınýtqa sozyldy. Osylaısha, Rybakına Rımde shy­myldyǵy túrilgen dúbirli dodanyń jeńimpazy atandy. Bul jarys oǵan ne berdi? Birinshiden, Elena WTA týrnırindegi kezekti jeńisine qol jetkizdi. Ekinshiden, bul – onyń grýntta ótetin asa iri halyqaralyq týrnırlerdegi tuń­ǵysh tabysy. Úshinshiden, 521 754 eýro kóleminde tabys tapty. Tór­tinshiden, 1000 upaıdy ıelenip, álemdik reıtıngte tórtinshi orynǵa kóterildi. Bul – Qazaqstan ten­nısinde buryn-sońǵy bolmaǵan jaǵdaı. Endi erteń Parıjde Rolan Garros týrnıri bastalady. Sol jarysta Elena Rybakına bastaǵan el tennısshilerine zor tabys tileımiz.

Elena Rybakınadan bólek, bul jarysta Iýlııa Pýtınseva da óner kórsetti. Tusaýkeser kezdesýinde ol bolgarııalyq Vıktorııa Tomo­vany tize búktirgenimen, ekin­shi kezeńde amerıkalyq Korı Gaýffqa jol berdi. Erler jary­synyń júlde qory 7 705 780 eýro dep belgilendi. Bul básekede Aleksandr Býblık baq sy­nady. Jerlesimiz ıspanııalyq Pedro Martınes-Portero men ame­rıkalyq Ben Sheltonǵa shań qap­tyrǵanymen, úshinshi kezeńde nor­vegııalyq Kasper Rýýdqa jol berdi.