Bıyl Prezıdent Qasym-Jomart Toqaevtyń tapsyrmasymen memlekettik qyzmetti túbegeıli jańǵyrtý boıynsha birqatar is-shara júzege asyryldy. Onyń basym bóligi naýryzda qabyldanǵan «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zańda kórinis tapty.
«Byltyr jeltoqsan aıynda memlekettik qyzmetke kirýde artyq kedergilerdi joıý jáne memlekettik qyzmetten shyǵý tártibin jeńildetý boıynsha qoldanystaǵy zańnamaǵa tıisti ózgerister engizildi. Endi memlekettik grantpen oqý oryndaryn aıaqtaǵan túlekter memlekettik qyzmetke birden taǵaıyndalady. Zańdy iske asyrý maqsatynda aqpan aıynda Memlekettik qyzmet isteri agenttiginiń buıryǵymen joǵary nemese joǵary oqý ornynan keıingi bilim berý baǵdarlamalary boıynsha memlekettik tapsyrys sheńberinde Prezıdent janyndaǵy bilim berý uıymdarynda jáne bilim berý uıymdarynda oqýdy aıaqtaǵan adamdarǵa oqytý nátıjesiniń mánderi belgilendi. «B» korpýsynyń joǵary laýazymdaryna tikeleı taǵaıyndaýdy júzege asyrý múmkin boldy. Osylaısha, tıisti akademııalyq nátıje 3,33 GPA, ıaǵnı dástúrli júıe boıynsha «jaqsy» nemese 100 baldyq júıe boıynsha 85-89 deńgeıinde bolýy kerek. Osy ózgerister arqasynda ýákiletti organmen kelisim boıynsha «B» korpýsynyń joǵary laýazymdaryna tikeleı taǵaıyndaýdy júzege asyrý múmkin boldy. Jastar ári qaraı jalǵastyramyn dese, merıtokratııa qaǵıdatymen jumys isteı beredi. Bul bilikti jastardy memlekettik qyzmetke yntalandyrýǵa, jas mamandardyń aýdan men aýyldyq aımaqtarǵa oralýyna, sonymen qatar óńirlerdegi kadr tapshylyǵyn azaıtýǵa septigin tıgizip, memlekettik qyzmetke kirýdi ońtaılandyrady», dedi D.Jazyqbaev.
Zańnamaǵa engizilgen ózge de tolyqtyrýlarǵa sáıkes budan bylaı eki toqsan boıy tıimsiz dep baǵalanǵan qyzmetshilerdiń laýazymy tómendetiledi. Al tómengi bos laýazym bolmaǵan jaǵdaıda qyzmetten shyǵarylady. Bul memlekettik qyzmetten shyǵý tártibin jeńildetedi. Sondaı-aq agenttik tóraǵasy prezıdenttik jastar kadrlyq rezervi bıyl taǵy da mamandarmen tolyǵatynyn aıtty.
«Prezıdent rezervindegi jastardyń kóbi jeke sektordan keldi. Naqty aıtar bolsaq, 90 paıyzy. Qazir biz 266 adamdy ornalastyrdyq. Olardyń 34-i saıası jáne «A» korpýsynda qyzmet etedi. Sonymen qosa memlekettik organdarda basshylyq qyzmetterde, dırektordyń orynbasary, dırektor departamentiniń basshylyǵy, basqarma basshylary syndy qyzmetter atqaryp jatyr. Jalpy, jyl saıyn bilikti jastardyń memlekettik qyzmetke aralasýyna múmkindik usyný qajet. Bıyl biz birinshi ret óńirlerde Prezıdenttik jastar kadrlyq rezervin jasaqtaımyz. Oǵan aýdan ákiminiń orynbasarlary, aýdandardaǵy bólim basshylary nemese oblystyq deńgeıdegi bólim bastyqtary, basqarma basshylarynyń orynbasarlary qabyldanady», dedi ol.
