Gılen Soı «Astana» medısına ýnıversıteti ashylǵan tustan berige deıin 42 jyl sol shańyraqta jumys istegen. Oblystyń bas hırýrgi bolǵan tusta da professor Gılen Vasılevıch dosent, keıin kafedra meńgerýshisi bolyp, eńbek jolyn pedagogıkamen ushtastyrǵan. G.Soıdyń tárbıesin kórgen shákirtteri qazir elde jáne shetelde tabysty eńbek etip júr. Mamandyǵyna janashyr ustaz jolyn jalǵaǵan keıingi tolqyn, salanyń shyn sheberi bolýǵa talpynýdan tanbaıdy. Muny biz konferensııaǵa kelgen qaýymnyń qarasyna qarap bile bersek bolatyndaı.
Osy kúni qonaqtar hırýrg G.Soıǵa arnalǵan eskertkish taqtanyń ashylý saltanatyna qatysty. Kópshiliktiń ortasynda Gılen Soıdyń týystary, dostary men shákirtteri, akademık, ǵalymdar, qoǵam qaıratkerleri boldy. Sonymen qatar Germanııa, Ázerbaıjan, Qyrǵyzstan, О́zbekstan jáne basqa da alys-jaqyn shetelderdiń hırýrg ǵalymdary tóbe kórsetti. Keıin konferensııa zalynda kópshiliktiń aldynda birinshi bolyp sóz sóılegen «Astana» medısına ýnıversıtetiniń rektory Kamaljan Nadyrov konferensııanyń maqsat-mindeti jaıynda tarqatyp aıtyp berdi.
«Ýnıversıtette sheteldik áriptesterimizben tájirıbe almasý, hırýrgııa salasynyń damýyn talqylaý – biz úshin mártebe. G.Soı osy oqý ornynda 40 jyldan asa ýaqyt eńbek etti. Bilikti dárigerler tobyn tárbıeledi. Konferensııa qorytyndysy budan keıingi ǵylymı jumystarǵa negiz bolatynyna, hırýrgııalyq qyzmetti odan ári damytý úshin tujyrymdama aıqyndaıtynyna jáne salada bilim berý úderisin jetildirýge yqpal etetinine senimdimin», dedi ol.
Konferensııada Densaýlyq saqtaý mınıstrliginiń hırýrgııalyq kómek kórsetý salasyn damytýǵa erekshe den qoıyp otyrǵanyn ańǵardyq. Mysaly, bıyl sáýirde Densaýlyq saqtaý mınıstrliginiń buıryǵymen hırýrgııalyq kómek kórsetýdi uıymdastyrýdyń jańartylǵan standarty bekitildi. Bul jóninde mınıstrliktiń Medısınalyq kómekti uıymdastyrý departamentiniń dırektory Azamat Dúısenov habarlady.
«G.Soı ýnıversıtette 40 jyldan asa taban aýdarmaı eńbek etip, bilikti hırýrgterdiń shoǵyryn qalyptastyrdy. Ǵylym bir ornynda turmaıdy. Konferensııa zamanaýı medısınanyń ózekti máselelerine arnalyp otyr. Búgin salaǵa engiziletin jańa tehnologııalarmen qosa medısınada bilim-ǵylymdy damytý jaıy keńinen aıtylady. О́zderińiz biletindeı, keıingi 10 jyldyń sheńberinde densaýlyq saqtaý júıesinde hırýrgııalyq kómekti damytýǵa basymdyq berildi. Onyń ishinde kardıohırýrgııa men neırohırýrgııany ilgeriletýge erekshe kóńil bólindi. Osy kól-kósir qoldaýlar nátıjesin berip, qazir elimiz kardıohırýrgııa men neırohırýrgııalyq kómek kórsetý boıynsha jetekshi 30 eldiń qataryna kirip otyr. Elde hırýrgııalyq kómektiń basqa da baǵyttary qatar damyp jatyr. Árıne, osynyń barlyǵy hırýrgııaǵa eseli úles qosqan professor-ǵalymdardyń eńbeginiń jemisi dep aıtamyz. Endi búgingi konferensııada da medısınalyq kómektiń sapasyn arttyrý maqsatynda tájirıbe almasqaly otyrmyz», dep A.Dúısenov konferensııaǵa kelgen qaýymǵa tabys tiledi.
Gılen Soıdyń eńbek joly Aqmola oblysynyń tarıhymen de tyǵyz baılanysty. Tyń ıgerý jyldary ol bas hırýrg retinde Aqmola oblysy men Soltústik Qazaqstannyń hırýrgııalyq jáne travmatologııalyq qyzmetin uıymdastyrýǵa septesken. О́tken ǵasyrdyń 60-jyldaryna deıin ortopedııa, hırýrgııa jáne travmatologııa medısınada bir mamandyq retinde qarastyryldy. Iаǵnı G.Soı – tek hırýrgııanyń emes, sonymen qatar tyń ıgerý aımaǵyndaǵy ortopedııa-travmatologııalyq qyzmettiń negizin qalaýshy. Ol Selınograd memlekettik medısına ınstıtýty qurylǵan kúnnen bastap oblystyń bas hırýrgi qyzmetin pedagogıkalyq qyzmetpen qatar alyp júrgen. Qoly altyn hırýrg eńbek etýden jalyqpaı, 77 jasqa deıin operasııa jasaǵan. Rasynda, hırýrg, professordyń mamandyqqa adaldyǵy keıingi jas býyn dárigerlerge úlgi bolarlyq. Konferensııaǵa alys-jaqyn shetelden kelgen qonaqtar da G.Soıdyń eńbegin birinen soń biri tizbektep berdi. Ár eldiń professor ǵalymdary, usynystaryn ortaǵa saldy. Mysaly, Tashkent medısına akademııasy Úrgenish fılıalynyń dırektory Rashıd Rýzıbaev medısına mamandaryn daıarlaý isinde Astana medısına ýnıversıtetimen berik baılanys ornatý úshin ekijaqty memorandým jasaýdy usyndy. Izin ala qos tarap memorandýmǵa qol qoıyp, berik baılanys ornatýǵa ýaǵdalasty.
