24 mamyr kúni ótken májilis otyrysynda jýrnalıster «oqý jylynyń uzartylǵany ózin aqtamady» dep, jańa formatqa syn aıtqan edi. Tilshilerdiń aıtýynsha, arnaıy uzartylǵan ýaqytta balalar sabaq oqymaı, oqýlyqtaryn tapsyrady nemese synyp saǵattaryn ótkizedi.
Ashat Aımaǵambetov osy kezeńde balalarynyń sabaq oqıtynyn aıtty. Onyń aıtýynsha, ár óńirde jaǵdaı ózgeshe sıpat alady.
«Eger oqýlyqtar ázirden jınalyp alyp jatsa, bul suraqty maǵan emes, Oqý-aǵartý mınıstrligine qoıý kerek. Áriptesterim máseleni der kezinde sheship jatqanyna senimdimin», dedi Ashat Aımaǵambetov
Ol saıası jumysta mınıstr nemese basqa memlekettik qyzmetker barlyǵyna birdeı unaıtyn sheshimderdi qabyldamaýy kerek ekenin eske saldy.
«Unamaıtyn, múmkin qazir túsinbeıtin, biraq elge, memleketke, balalarǵa qajet sheshim bolsa, ony unasa da, unamasa da qabyldaı bilý kerek. Mysaly, biz mektep dırektorlarynyń jumys isteý mezimin 5 jylmen shektedik. Bul dırektorlarǵa unady dep oılaısyz ba? Árıne, unamaıdy. Mysaly, biz JOO bitirip, muǵalim bolǵysy keletinderge «endi mektepke turý úshin dıplom ǵana emes, óz pániń boıynsha test tapsyr» dedik. Oqý bitirgen mamannyń 90%-y testileýden óte almady. Soǵan baılanysty biz 50-ge jýyq ýnıversıtettiń lısenzııasyn alyp qoıdyq. Bul ýnıversıtetke de, onda oqyǵan túlekterge de unamaıtyn sheshim. Biraq bul sheshim kerek pe? Kerek. Eger sol sheshimdi qabyldaı turyp, jumystan ketýge májbúr bolsań, sonda da qabyldaý kerek. Meniń oıymsha, bul tásil bilim salasynda óte mańyzdy», dep oıyn aıaqtady Ashat Aımaǵambetov.
