Ony «Google Play» jáne «App Store» arqyly júktep alýǵa bolady. Jobada qala, el tarıhy týraly aqparatty erkin túrde bekitýdiń eki ádisin engizý qarastyrylǵan.
«Joba «Meniń qalamnyń, elimniń tarıhyn zertteýde ICT-tehnologııalardy qoldaný» dep atalady. Bul – buǵan deıin ózim daıyndaǵan eki shaǵyn qosymshanyń biriktirilgen nusqasy. Birinshisi – qoǵamdyq kóliktegi eskertý júıesin jańartý arqyly qala tarıhyn tanystyrý. Atalǵan ıdeıa qoǵamdyq kólikterdegi dybysty habarlamalar arqyly tarıhı aqparatty qosýǵa arnalǵan. Ekinshisi – «Aialdama» mobıldi qosymshasy. Men ázirlegen mobıldi qosymshany paıdalanýshy kósheni kesip ótken sátte sol kóshege qatysty nemese sol aýmaqtaǵy nysandar týraly aqparat beredi. Jobanyń maqsaty – oqýshylarǵa el tarıhyn kúndelikti ómirde tanyp-bilýge kómektesý. Tarıhty bilý mańyzdy», dedi Tımýr Qyrbasov.
Jas ónertapqyshtyń bastamasymen qurylǵan «ENACTUS» komandasy mektep kásipkerliginiń II respýblıkalyq chempıonatynyń fınalısi atanǵan. Gımnazııa bazasynda ashylǵan oqýshylardyń praktıkalyq-teorııalyq ortalyǵy joǵary synyp oqýshylaryna naqty kásiporynda tańdalǵan mamandyqty praktıkalyq túrde tekserýge múmkindik beredi.
Sonymen qatar Tımýr úsh jobanyń avtorlyq quqyǵyn qorǵady. Keıingi úsh jylda halyqaralyq jáne respýblıkalyq ǵylymı jobalardyń júldesin ıelendi. «ICT Solutions Kazakhstan» baıqaýynda jobany iske asyrýǵa 1 mln teńge utyp aldy. Sondaı-aq 2023 jyldyń «Jyl oqýshysy» atandy. О́tken jyldyń 1 maýsymynda onyń «Almaty BalaFest» qalalyq festıvalinde Memleket basshysynyń nusqaýshysy bolǵanyn da eske sala keteıik.
Qazir Tımýr oqıtyn №15 gımnazııa bilim berý baǵdarlamasynyń negizgi úsh baǵytyna basymdyq berip otyr. Olar – oqýshynyń aǵylshyn tilin jaqsy meńgerýi, ǵylymı-zertteý jumystaryna yntalandyrý jáne kóshbasshylyq qasıetterdi shyńdaý. Osy basymdyqtardyń nátıjesinde Tımýr sekildi jas jetkinshekter óz jobalaryn sátti qorǵap júr.
Mereı AÝǴALI,
L.N.Gýmılev atyndaǵy EUÝ stýdenti
