Sot úkimimen Rústem Baıseıitov kináli dep tanylyp, 4 jyl 6 aıǵa bas bostandyǵynan, sondaı-aq memlekettik qyzmette laýazymdy qyzmet atqarý quqyǵynan aıyryldy.
Sondaı-aq:
- Almaty qalasy Sport basqarmasynyń qarjy-ekonomıkalyq bóliminiń burynǵy basshysy Áıgerim Baıǵonova 3 jyl 6 aıǵa;
- «Qazaqstan Golf Federasııasy» RQB-nyń sport menedjeri Álııa Smaqova 3 jylǵa;
- Qazaq Sport JShS dırektory Erjan Muhamanov 7,5 jylǵa bas bostandyǵynan aıyryldy.
Osy jyldyń qańtar aıynda Antıkor Almaty qalasy sport basqarmasynyń laýazymdy tulǵalaryna qatysty 367 mıllıon teńge jymqyrý faktisi boıynsha sotqa deıingi tergeýdiń aıaqtalǵanyn habarlady.
Basty kúdiktilerdiń biri – Almaty qalalyq sport basqarmasynyń eks-basshysy Rústem Baıseıitov. Ol pandemııa kezeńinde (2020-2021 jj.) qaramaǵyndaǵy qyzmetkerlerimen koronavırýs ınfeksııasyna baılanysty baqylaý men shekteýlerdiń baıaýlaǵanyn paıdalanyp, JShS dırektorynyń týystarynyń banktik shottaryna aqsha aýdarǵany anyqtaldy.
Alaıda, Sport basqarmasynyń burynǵy basshysy sotta óz kinásin tolyq moıyndamaıtynyn aıtty.
