32 jastaǵy Kelvınniń ata-anasy erterekte Meksıkadan AQSh-qa qonys aýdarǵan. О́zi Kalıfornııa shtatynyń San-Hose qalasynda dúnıege kelgenimen, balalyq pen jastyq shaǵy Iýma shaharynda ótti. Alǵashynda Gastelým erkin kúrespen aınalyssa, eseıe kele aralas jekpe-jekpen shuǵyldandy. 2013 jyly «The Ultimate Fighter» dep atalatyn realıtı-shoýda kózge túskennen keıin daryndy jigit ataqty Cheıl Sonnenniń komandasyna qabyldandy. Túrli týrnırlerde qatarynan alty ret jeńiske jetkennen keıin UFC-men kelsimshartqa otyryp, «Temir» degen janama esimge ıe boldy. Sporttyń bul túrinde AQSh faıteri barlyǵy 26 kezdesý ótkizip, 17 márte jeńiske jetti. 10 qarsylasyn esinen tandyrdy. Segiz ret utylyp, taǵy bir básekeniń nátıjesi esepke alynǵan joq. Sol jekpe-jekterde ony tek Krıs Vaıdman (2017 jyly) men Djek Hermansson (2020) ǵana merziminen buryn jeńdi. Qalǵan aıqastarda sheshimdi tóreshiler shyǵardy.
Kezinde Kelvın Gastelý Neıt Markvard, Djonnı Hendrıks, Tım Kennedı, Maıkl Bıspıng, Ronaldý Soýza, Krıs Kertıs syndy sańlaqtardy ońdyrmaı sabady. 2017 jyly Brazılııanyń Fortaleza qalasynda ótken týrnırde ol áıgili Vıtor Belfortty birinshi raýndta uryp jyqty. Keıinnen «Temirdiń» marıhýana shekkeni anyqtalyp, bul básekeniń nátıjesi esepke alynbady. 2019 jyldyń sáýir aıynda Kelvın orta salmaqtaǵy «ýaqytsha» chempıondyq ataǵy úshin aıqasty. Biraq bul tartysta Israel Adesanıanyń asyǵy alshysynan tústi.
Al Shavqat Rahmonovtyń júrip ótken joly jankúıerlerdiń kóz aldynda. 28 jastaǵy qandasymyz 17 ret oktagonǵa shyǵyp, barlyq básekede aıqyn basymdyq tanytty. Segiz qarsylasyn uryp jyqsa, toǵyzy «qylqyndyrý» nemese «aýyrtý» tásilinen keıin jer toqpaqtaýǵa májbúr boldy. Keıingi jekpe-jegin «Nomad» bıylǵy jyldyń 4 naýryzynda Las-Vegasta jergilikti faıter Djeff Nılge qarsy ótkizip, ony úshinshi raýndta «qylqyndyryp tastady».
