«Nurjan Áltaev Eńbek jáne áleýmettik qorǵaý vıse-mınıstri, keıinnen QR Parlamenti Májilisiniń depýtaty retinde júıeli negizde «Atameken» Ulttyq Kásipkerler palatasynyń Basqarma tóraǵasy A.I. Myrzahmetovten asa iri mólsherde para aldy degen kúdikke ilindi», dep habarlady sybaılas jemqorlyqqa qarsy is-qımyl agenttiginiń baspasóz qyzmeti.
Vedomstvo málimetinshe, 2018-2020 jyldar kezeńinde jaýapty memlekettik laýazymdardy atqara otyryp, ol A.I. Myrzahmetovtyń múddesi úshin áreket etip, onyń uıymyna memlekettik tapsyrystardy alýyna yqpal etip, jalpy qamqorshylyq kórsetken.
Qazir Áltaev Astana qalasy polısııa departamentiniń ýaqytsha ustaý ızolıatoryna qamaldy. Tergeý amaldary jalǵasyp jatyr.
QR QPK 201-babyna sáıkes tergeý múddesi úshin ózge aqparat jarııa etýge jatpaıdy.
«Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», dep jazdy agenttikten.
