Endigi másele elektromobıldi kedendik bajsyz resimdeý tártibine qatysty bolyp tur. О́ıtkeni qazirgi ýaqytta álemniń damyǵan elderiniń bárinde ekologııalyq standarttarǵa erekshe kóńil bólinip, bolashaqta kólik qozǵalysynyń elektromobıldik túrine kóshý máselesine baılanysty keshendi sharalar qolǵa alynyp jatyr. Osy oraıda Jetisý oblysy boıynsha memlekettik kirister departamenti «Altynkól-jol» keden beketi basshysynyń orynbasary Beken Nurahmetov Qazaqstan Respýblıkasynyń azamatyna jáne Qazaqstan Respýblıkasynda turaqty turatyn tulǵaǵa kedendik salyqtar men tólemderden bosatyla otyryp, 1 elektromobıl ákelýge ruqsat etilgenin atap ótti. Onyń málimdeýinshe, bul is-áreket Qarjy mınıstrligi Memlekettik kirister komıteti, Eýrazııalyq ekonomıkalyq komıssııasy Alqasynyń 2017 jylǵy 20 jeltoqsandaǵy «Jeke paıdalanýǵa arnalǵan taýarlarǵa baılanysty keıbir máseleler týraly» №107 sheshimi 3-qosymshasynyń 9-tarmaǵyna sáıkes qolǵa alynyp otyr.
Al kedendik rásimderden ótý úshin qandaı qujattar kerek degen suraqqa keler bolsaq, Beken Nurahmetovtiń habarlaýynsha, Qazaqstan Respýblıkasy azamatynyń jeke basyn kýálandyratyn qujat, ıelený, paıdalaný jáne (nemese) olarǵa bılik etý quqyǵyn rastaıtyn qujattar, sondaı-aq taýarǵa ilespe qujattar (CMR, TTN, ınvoıs, teh.tólqujat) jáne óz qolymen toltyrylǵan kedendik deklarasııasyn jolaýshy keden beketiniń ınspektoryna usyný qajet. «Bul rette, deklarasııa blankisi, ony toltyrǵany jáne deklarasııany tapsyrý úshin eshqandaı aqsha tólenbeıdi. Sonymen qatar elektromobıldi rásimdegen azamatqa Reseı Federasııasynyń azamattyǵy bar jáne Reseı Federasııasynda turaqty turatyn tulǵalarǵa kedendik tazartýdan ótkennen keıin 3 jyl boıy ıelený, paıdalaný jáne (nemese) olarǵa bılik etý quqyǵyna shekteý qoıylatynyn eskertip ótkenimiz artyq bolmas», deıdi «Altynkól-jol» keden beketi basshysynyń orynbasary.
El turǵyndary arasynda elektr qýatymen júretin mundaı kólikke suranys kúnnen-kúnge artyp keledi. Máselen, osydan jeti jyl buryn Qazaqstanda 19 elektr kóligi tirkelse, ótken jyly olardyń sany 900-ge jýyqtaǵan. Bul kólikterdiń jartysyna jýyǵy Almaty kóshelerinde júr.
Jalpy, Qazaqstanda qazir 4,5 mln kólik tirkelgenin eskersek, elektromobıl naryqta barlyq «temir tulpardyń» 0,02 paıyzyn quraıdy eken. Elektrli kólikter ishinde «VW ID» 4,5,6 degenderi, sondaı-aq «Zeekr 001» markisi de úlken suranysqa ıe bolyp júr. Alaıda Májilis depýtaty Erlan Jańbyrshın «Qazaqstanda elektromobılderdi paıdalaný úshin damyǵan ınfraqurylymnyń bolmaýy, sondaı-aq olardyń qunynyń qymbattyǵynan elektr qozǵaltqyshy bar avtomobılderdiń úlesi áli de tómen», deıdi.
«Mysaly, Qazaqstanda bar bolǵany 100-den asa elektrmen qýattaıtyn stansa bar. Al Germanııada mundaı 7 myńnan astam stansa jumys isteıdi. Fransııa 2030 jylǵa deıin elektrmen qýattaıtyn stansalardyń sanyn 7 mln-ǵa jetkizýdi kózdep otyr. Sol sebepti elimizde elektromobılderdi damytýǵa qatysty daıyndaǵan zań jobalary elektromobılderdiń ınfraqurylymyn damytýǵa baǵyttalǵan. Zań jobalarynda «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly», «Avtomobıl joldary týraly», «Avtomobıl kóligi týraly», «Erekshe qorǵalatyn tabıǵı aýmaqtar týraly», «Jol júrisi týraly» zańdaryna túzetýler engizý kózdelgen», deıdi depýtat.
