Reseı Prezıdenti Vladımır Pýtın Qasym-Jomart Toqaevqa jáne Qazaqstan halqyna Qazaqstannyń shyǵys aımaǵyndaǵy alapat orman órtine baılanysty óziniń qoldaýyn jáne jyly lebizin bildirdi.
«Tabıǵat apatynyń aýyr saldary eńserilip, zardap shekken aýmaqtar qalypty ómirge oralatynyna senimdimin», dep jazylǵan Reseı Prezıdentiniń jedelhatynda.
О́zbekstan Prezıdenti Shavkat Mırzııoev alapat orman órti saldarynan adamdardyń qaza tapqany týraly sýyt habardy tereń kúızelispen qabyldaǵanyn jetkizgen.
«Osyndaı qaıǵyly sátte Sizge jáne baýyrlas ári dostas Qazaqstan halqyna kóńil aıtamyn. Qaza tapqandardyń týystary men jaqyndarynyń qaıǵylaryna ortaq ekenimdi jetkizýińizdi suraımyn. Bul tótenshe jaǵdaı jaqyn arada tolyǵymen eńseriletinine senimdimin», delingen О́zbekstan Prezıdentiniń jedelhatynda.
Qyrǵyzstan Prezıdenti Sadyr Japarov Qasym-Jomart Toqaevqa orman órti saldarynan adamdardyń qaza tabýyna baılanysty qaıǵyryp kóńil aıtty.
«Orny tolmas qaıǵyǵa ortaqtasa otyryp, qaza tapqan qazaqstandyqtardyń týystary men jaqyndaryna kóńil aıtamyn», dep jazylǵan Qyrǵyzstan Prezıdentiniń jedelhatynda.
Tájikstan Prezıdenti Emomalı Rahmon Úkimet pen dostas Qazaqstan halqynyń kúsh-jigerimen órttiń jaqyn arada aýyzdyqtalatynyna senim bildirdi.
«Abaı oblysyndaǵy aýqymdy órt saldarynan adamdardyń qaza tapqany jónindegi qaıǵyly habardy tereń kúızelispen qabyl aldyq. Barsha baýyrlas Qazaqstan halqyna, qaza tapqan azamattardyń týystary men jaqyndaryna qaıǵyryp kóńil aıtamyz», dep jazdy Tájikstan Prezıdenti.
Túrikmenstan Prezıdenti Serdar Berdimuhamedov adam shyǵynyna ákep soqtyrǵan Abaı oblysyndaǵy alapat orman órtine baılanysty Qasym-Jomart Toqaevqa kóńil aıtty.
«Túrikmenstan halqy men Úkimeti atynan jáne óz atymnan qaza tapqan azamattardyń týystary men jaqyndaryna kóńil aıtamyn, sondaı-aq zardap shekken aýmaqtyń tezirek qalpyna kelýine tilektestik bildiremin», delingen Serdar Berdimuhamedovtiń jedelhatynda.
Ázerbaıjan Prezıdenti Ilham Álıev Abaı oblysyndaǵy alapat orman órti saldarynan adamdardyń qaza tapqany jáne aýyr shyǵynǵa ákep soqtyrǵany týraly habardy aýyr kúızelispen qabyldaǵanyn jazdy.
«Osy qaıǵyly jaǵdaıǵa baılanysty ózimniń jáne ázerbaıjan halqynyń atynan qaza tapqandardyń otbasyna jáne jaqyndaryna, búkil Qazaqstan halqyna kóńil aıtamyn. Sondaı-aq tabıǵat apaty bolǵan aýmaqtyń tezirek qalpyna kelýine tilektestik bildiremin», delingen Ilham Álıevtiń jedelhatynda.
Túrkııa Prezıdenti Rejep Taııp Erdoǵan Túrkııa halqynyń atynan jáne óz atynan qaza tapqandardyń otbasy men týystaryna qaıǵyryp kóńil aıtty.
«Osy qaıǵyly sátte qaza tapqandardyń otbasy men týystaryna kóńil aıtamyn. Túrik halqynyń atynan jáne óz atymnan zardap shekkenderdiń tezirek saýyǵyp ketýine tilektestik bildiremin», dep jazylǵan Túrkııa Respýblıkasy Prezıdentiniń jedelhatynda.
Pákistan Premer-mınıstri Shahbaz Sharıf Qazaqstandaǵy orman órti saldarynan 14 adamnyń qaza tabýyna baılanysty kóńil aıtty.
«Pákistan Úkimeti men halqynyń atynan Prezıdent Qasym-Jomart Toqaevqa jáne qaza tapqan azamattardyń otbasyna qaıǵyryp kóńil aıtamyn. Zardap shekkenderdiń tezirek saýyǵyp ketýi úshin duǵa etemin», dep jazdy Shahbaz Sharıf.
Kóńil aıtý jedelhattary áli de kelip túsip jatyr.
