Shymkenttik «Clutch» toby «Innovation Project Award» nomınasııasynda úzdik úshtikke enip, qola júldege ıe boldy. Olar jel generatory men kún panelderinen alynatyn elektr energııany saqtaýǵa múmkindik beretin ınnovasııalyq joba usynǵan bolatyn. Jel elektr stansasyn daıyndaǵan qaraǵandylyq «JelToqSun» komandasy el tarıhynda alǵash ret jarystyń «Champions Award» basty júldesiniń úshinshi ornyna qol jetkizdi.
– Biz chempıonatqa jarty jyldan astam ýaqyt daıyndaldyq. Úsh kúndik jarys biz úshin óte qyzyqty boldy. О́ıtkeni myqty qarsylastarmen betpe-bet keldik. Alǵashynda qobaljyǵanmen ishki qorqynyshty jeńip, óz qabiletimizdi kórsete aldyq. Biz robottar oıynynda kóshbasshylar qatarynda boldyq. Innovasııalyq jobany tanystyryp, uıymshyldyǵymyzdy kórsete bildik, – dedi qatysýshylardyń biri Akbar Ermekov.
Jarys arasynda otandyq oqýshylar «Massachusetts Institute of Technology», «Boston University» jáne «Harvard» sekildi bedeldi oqý oryndarynyń ınjenerlik fakýltetterine baryp, professorlarmen jeke tanysty. Olardyń pikirin tyńdap, óz tájirıbelerine qajet keńes aldy.
Esterińizge sala keteıik, eki komanda da Oqý-aǵartý mınıstrliginiń qoldaýymen jyl basynda «USTEM Robotics» qoǵamdyq qory uıymdastyrǵan «FIRST Central Asia» Ortalyq Azııa oıyndarynda halyqaralyq chempıonatqa joldama alǵan bolatyn.
Aqsuńqar HABAS,
L.N.Gýmılev atyndaǵy
EUÝ stýdenti
