Atalǵan aınalma avtojoly el tarıhyndaǵy alǵashqy konsessııalyq joba bolyp sanalady. Onyń qurylysy 3 jyl buryn túrik-koreıalyq konsorsıýmynyń negizinde qolǵa alynyp, josparǵa sáıkes 2024 jyly qoldanysqa berilýi kerek edi. Dese de qarqyndy jumystardyń nátıjesinde bul nysan merziminen buryn tapsyrylyp otyr. QR IIDM Avtomobıl joldary komıtetiniń tóraǵasy Tólegen Abdýllın avtojoldyń tıimdiligi men basymdyqtaryn atap ótti. Onyń aıtýynsha, Úlken Almaty aınalma avtojoly megapolıs kóshelerindegi jáne qala mańyndaǵy keptelisti azaıtyp, ekologııalyq jaǵdaıdy jaqsartady.
«Bul elimizdiń tarıhyndaǵy mańyzdy sátterdiń biri. Sebebi Úlken Almaty aınalma avtojoly Ortalyq Azııadaǵy eń iri ınfraqurylymdyq joba sanalady. Osy jol qurylysy halyqtyń ıgiligi úshin qolǵa alynǵanyn atap ótken jón. Sondaı-aq atalǵan joba megapolıs turǵyndary men jergilikti halyqtyń erkin qozǵalýyna septigin tıgizeri anyq», dedi Tólegen Abdýllın.
Konsessııa tetigine sáıkes, qurylys jumystaryn ınvestor jeke qarajatyn esebinen júrgizgen. Endi taıaý 16 jyl boıy jol ınvestordyń kepildik merziminde bolady. 66 shaqyrymǵa jalǵasqan aınalma joldy jarty saǵatta eńserýge bolady.
Kólik júrgizýshileri jańa joldyń tıimdiligin baıqap, rızashylyqtaryn jetkizdi.
«Bul aınalma jol Almaty qalasy men Almaty oblysyna shynymen de qajetti jobalardyń biri. О́z basym júk tasymalymen aınalysamyn jáne Almatynyń keptelisterin jaqsy bilemin. Úlken Almaty aınalma joly ashylsa, júk tasymaldaýshylar men qarapaıym turǵyndardyń júrip-turýy jeńildep, keptelis máselesi sheshiledi degen oıdamyz», dedi kólik júrgizýshisi Mıhaıl Dranısa.
Almaty oblysynyń ákimi Marat Sultanǵazıevtiń aıtýynsha, jańa jol-kólik ınfraqurylymy óńirdiń áleýmettik-ekonomıkalyq kórsetkishterin jaqsartyp, halyqtyń ál-aýqatyn arttyrýǵa yqpal etedi.
«Atalǵan aınalma avtojoly - memleket-jekemenshik áriptestik aıasynda salynǵan elimizdegi mańyzdy ınvestısııalyq jobalardyń biri. Ol tutastaı óńirdiń ekonomıkalyq damýyna serpin beretin Batys Qytaı – Batys Eýropa tranzıttik dáliziniń negizgi tarmaǵy bolyp sanalady. Osy jol oblysymyzdyń damýyna áser berip, ınvestısııalyq jáne týrıstik áleýetti arttyrady degen senimdemiz», dedi M.Sultanǵazıev.
Osy jıynǵa qatysqan Almaty qalasy ákimi Erbolat Dosaev Úlken Almaty aınalma avtojoly Almaty aglomerasııasynyń kóliktik negiziniń negizi bolyp tabylatynyn aıtty. Almaty qalasynyń 2040 jylǵa deıingi jańa Bas jospary aıasynda búginde osy jolǵa aparatyn alty radıaldy jol salynyp jatyr. Jalpy, el aýzynda BAKAD atalyp ketken jol boıynda tolyqqandy avtokólik qozǵalysy iske qosyldy. Aınalma jol 1-a tehnıkalyq sanaty boıynsha salynǵan. Atalǵan jobany qarjylandyrýǵa Eýrazııalyq damý banki de qatysqanyn atap ótken abzal.
«Úlken Almaty aınalma avtojoly Qazaqstan men Eýrazııa aımaǵynda kólik marshrýttaryn keńeıtý boıynsha mańyzdy ról atqarady. Jańa nysan «Shyǵys-Batys» baǵytyndaǵy halyqaralyq avtokólik marshrýttaryn baılanystyryp, kólik qatynasyn jaqsartýǵa, júk tasymalynyń múmkindikterin keńeıtýge oń yqpal etedi. Osy jol arqyly tasymaldanatyn júktiń boljamdy kólemi taıaý 10-15 jylda 87%-ǵa ulǵaıyp, 35,9 mln tonnaǵa jetýge tıis», dedi Eýrazııalyq damý bankiniń basqarma tóraǵasy Nıkolaı Podgýzov.
Resmı bólimnen keıin jańa joldyń boıymen birneshe kólik júrip ótti. Atap aıtqanda, ÚAAAJ belgileri bar 10 aýyr júk kóligi, 10 avtobýs jáne jeńil avtokólikter Qaskeleń qalasyna deıin jol tartty.
