«Qazir batys elderinde «antı-ınflıýenser» degen qozǵalys birte-birte qalyptasyp jatyr. Bul qozǵalys ınternet basylymdar arqyly azamattarǵa, jastarǵa taraıtyn barlyq aqparatqa, derekterge, ásirese, jalǵan maǵlumattarǵa, ıaǵnı, fake news-qa zor kúmánmen qaraıdy, ıaǵnı adamdardyń sanasyn jaýlap jatqan, tipti, olarǵa ımandaı senýge bolatyn ıdeologııa sekildi qubylystardy joqqa shyǵarady. Bizdiń elimizde de jalǵan aqparat taratatyn basylym-symaqtar bar. Bul – qupııa emes. Olardyń artynda naqty qaltaly adamdar, tipti, yqpaldy elder bar», dedi Prezıdent.
Memleket basshysy sheteldik tájirbıege nazar aýdarýdyń mańyzyn aıtty.
«Al, jańa qozǵalystyń negizgi maqsaty – dástúrli qundylyqtardy dáripteý, eń aldymen, bul ádebıettegi, sondaı-aq aqparat salasyndaǵy dástúrdi saqtaý. Sondyqtan, biz de álemde bolyp jatqan osy jańa úrdiske nazar aýdarǵanymyz jón. Bul úrdister búginde túrli aqparatpen ıdeologııalyq turǵydan ýlanyp jatqan qoǵamdy saýyqtyratyn kúshke aınalýy ábden múmkin.
Jalpy, osyndaı mańyzdy isterge, sonyń ishinde kitap shyǵarý isine Qazaqstan Jazýshylar odaǵy belsene atsalysýy kerek. Bir aı buryn uıymnyń kezekti quryltaıy ótti, jańa Tóraǵa saılandy. Bul – kórnekti qalamger Mereke Ábdeshuly Qulkenov. Jaqynda men onymen kezdestim, qazaq ádebıetiniń bolashaǵy, damýy týraly áńgime boldy», dedi Qasym-Jomart Toqaev.
