Memleket basshysy kınogerler men kınoteatr ıeleriniń múddeleri teń bolýy keregin atap ótti.
«Qazir kınoteatr ıeleri otandyq fılmderdi ekrannan kórsetý úshin qomaqty qarjy talap etedi. Bıletten túsken qarjynyń edáýir bóligi taǵy da kınoteatrlardyń jáne jeke kompanııalardyń qaltasyna ketedi. Buǵan qosa, kınogerler fılmdi naqty qansha adam kórgenin anyqtaı almaıdy. Qysqasy, kınoǵa búkil bilimin, kúsh-qaıraty men ýaqytyn sarp etken mamandarǵa tabystyń az ǵana bóligi tıedi. Kıno mamandary paıda tabý úshin óte arzan fılmder túsirýge májbúr. Sondyqtan, quny arzan, mazmuny arzan fılmder paıda bolyp jatyr.
Otandyq kınonyń damýyna jańasha kózqaras, tyń serpin kerek. Mysaly, kınoǵa barǵan kórermen sanyn esepteıtin sıfrlyq júıe engizýge bolady. Mádenıet jáne sport mınıstrligine jýyq arada osy júıeni daıyndap, qoldanysqa engizýdi tapsyramyn. Jalpy, kınoındýstrııany ekonomıkanyń jeke tarmaǵy retinde qarastyryp, máselelerdi naqty sheshken jón. Ásirese, kınogerler men kınoteatrlardyń arasyndaǵy qarym-qatynasta eki jaqtyń da múddesin teńdeı eskerý qajet. Sonda jańa keıipker, tarıhı qaharman, mańyzdy oqıǵalar jaıly fılmderdi tek «Qazaqfılm» emes, jeke kompanııalar da túsiredi. О́skeleń urpaq sheteldiń keıipkerine emes, óz batyrlarymyzǵa qarap boı túzeıtin bolady», dedi Prezıdent.
Sondaı-aq Memleket basshysy qazirgi tarıhı kınolardyń kemshilikterin atap, buryńǵy klassıkalyq fılmder sekildi kásibı fılm túsirilý keregin aıtty.
«Kezinde shyqqan «Qyz Jibek», «Otyrardyń kúıreýi», «Atamannyń aqyry» sııaqty klassıkalyq fılmder túsirilýi kerek dep sanaımyn. Sol kezde shyǵarmashylyq erkindik, mol qarajat jáne kompıýterlik grafıka da bolǵan joq. Degenmen, fılmder túsirildi, áli kúnge deıin halyqtyń júreginen oıyp turyp oryn alady. Shynyn aıtýymyz kerek, sońǵy kezde túsirilgen tarıhı fılmderdiń olqylyqtary kóp. Sol úshin mamandarmen aqyldasyp, jalpy kıno salasyn reformalaý kerek», dedi Qasym-Jomart Toqaev.
