Jyl saıyn avtomobıl jolyn kútip-ustaýǵa, aǵymdaǵy jóndeý jumysyn júrgizýge qarjy bólinip keledi. Máselen, ótken jyly Atyraý oblysyndaǵy jol ınfraqurylymyn jaqsartý úshin 35,8 mlrd teńge bólingen. Qomaqty qarjynyń 4,8 mlrd teńgesi jergilikti bıýdjetten qaralyp, oblystyq mańyzy bar 201 shaqyrym avtomobıl jolyna jóndeý jasalǵan. Sonyń nátıjesinde 1 387 shaqyrym joldyń jaǵdaıy jaqsy jáne qanaǵattanarlyq deńgeıge jetkizilgen. Bul – óńirdegi joldyń 72 %-y.
Oblys ákiminiń orynbasary Qaırat Nurtaevtyń deregine súıensek, kólik ınfraqurylymyn damytýǵa baılanysty josparly jumys bar. Bıyl 32 eldi mekendegi 120 shaqyrymǵa jýyq avtomobıl jolyn kúrdeli jóndeý, qaıta jańǵyrtý jumystaryna 22,9 mıllıard teńge bólingen. Qazir Inder – Qarabaý – Mııaly – Saǵyz aralyǵyn jalǵaıtyn avtomobıl jolyn jóndeýdi aıaqtaýǵa nazar aýdarylyp otyr. Ásirese Inder – Qarabaý aralyǵyn jalǵap jatqan 87 shaqyrym joldy qaıta jańǵyrtý kezek kúttirmeıtin mindetke aınalǵan.
Inder – Qarabaý – Mııaly – Saǵyz avtomobıl jolyn jańǵytýdyń birneshe mańyzy bar. Birinshiden, bul joldyń tezirek jańǵyrtylǵanyn ásirese Qyzylqoǵa aýdanynyń 30 myńnan asa turǵyny kútip otyr. О́ıtkeni qyzylqoǵalyqtardyń Inder men Mahambet aýdanyna, Atyraý qalasy men Batys Qazaqstan oblysyna qatynasy jeńildeıdi. Ekinshiden, bul kásipkerlik jáne aýyl sharýashylyǵy salasyna tyń serpin beredi.
Jaqynda Qyzylqoǵa aýdanyndaǵy Mııaly – Oıyl avtomobıl jolynyń 18 shaqyrymyn kúrdeli jóndeýden ótkizý qolǵa alyndy. Bul aýdanda kúrdeli jóndeýdi kútip turǵan taǵy bir jol bar. Bul – Mııaly men Taısoıǵan aýyldary aralyǵyndaǵy 50 shaqyrymdyq jol. Oǵan kúrdeli jóndeýdi júrgizetin merdiger mekemeni anyqtaý úshin ashyq konkýrs jarııalanǵan.
– Bıyl jeti aýdanda joldy jóndeý, jańǵyrtý júrgizilgeli otyr. Máselen, oblystyq mańyzy bar Qurmanǵazy – Prımore – Ýtery– Kotıaev avtomobıl jolynyń 0-29 shaqyrymyndaǵy ýchaskesi kúrdeli jóndeýden ótkizilip jatyr. Qurmanǵazy aýdanyna qaraıtyn 7-razezd – Asan – Azǵyr – Balqudyq – Súıindik baǵytyna qatynaıtyn 36 shaqyrymyna ortasha jóndeý júrgizilýde. Aýdandyq mańyzdaǵy Aqkól – Qyzyloba – 4-razezd – Qıǵash avtomobıl jolynyń 43 shaqyrymyn qaıta jańǵyrtý qolǵa alyndy, – deıdi Qaırat Nurtaev.
Mahambet aýdandyq turǵyn úı-kommýnaldyq sharýashylyǵy, jolaýshylar kóligi, avtomobılder joldary bóliminiń basshysy Syrymbet Kenjebaevtyń málimetinshe, jaqynda 11,2 shaqyrym aýylishilik joldyń qurylysy bastalǵan. Jobanyń quny – 2 mıllıard 488 mln teńge. Al merdigerlikke tańdalǵan «Tolaǵaı 2050» JShS jumysty 19 aıda aıaqtaýdy kózdep otyr.
«Bul joba aýdan ortalyǵyndaǵy 19 kósheni qamtıdy. Onyń ishinde 500, 300 metrlik kósheler bar. Bıyl atqarylatyn jumysqa 500 mln teńge qarjy bólindi. Osy qarjyǵa úsh kóshege jol salynady. Bıýdjetten qosymsha qarjy bólinse, taǵy eki kóshege jol asfalt tóseledi», deıdi Syrymbet Kenjebaev.
Onyń aıtýyna qaraǵanda, Mahambet aýylynda 2 shaqyrymdy qamtıtyn taǵy 14 kóshege jol salynatyn bolady. Bul jobanyń jalpy quny 2 mlrd 125 mln teńgeni quraıdy. Bıyl oblystyq bıýdjetten dál osy jobaǵa 300 mln teńge qarjy qaralǵan. Tamyz aıyna deıin merdiger anyqtalsa, josparly jumys bastalmaq. Joba aıasynda turǵyndar úshin 7 aıaldama salý kózdelgen.
Qurmanǵazy aýdanyndaǵy Aqkól, Dáshin, Zaton eldi mekenderinde kirme jáne aýylishilik jol jóndeýden ótedi. Shalǵaıdaǵy Qyzylqoǵa aýdanynyń Saǵyz, Kenbaı, Muqyr aýyldarynda jol qaıta jańǵyrtylady. Atalǵan aýdan ortalyǵy – Mııalyda aýylishilik joldy kúrdeli jóndeý, al Saǵyz aýylynda jol qurylysy jalǵasyn tabady. Al Inder aýdanynyń О́rlik aýylyndaǵy jol kúrdeli jóndeledi. Isataı aýdanynda Tushyqudyq, Isataı, Zıneden, Aqqystaý aýyldarynyń avtomobıl joldary qaıta jańǵyrady.
Dál osyndaı jumysty Jylyoı aýdanynyń ortalyǵy – Qulsary qalasyndaǵy «Atyraý» shaǵyn aýdany men Aqkıiztoǵaı aýylynda jalǵastyrý josparlanǵan. Aýdandyq turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspeksııasy bóliminiń basshysy Erjan Haınollaevtyń dereginshe, jańa shaǵyn aýdanda jol salý jumysy 2021 jyldyń tamyzynan beri jalǵasyp keledi. Qurylys materıaldarynyń qymbattaýyna baılanysty jobaǵa túzetý engizilgen.
«Munda 24 kóshege 22,1 shaqyrym kólik jáne jaıaý júrginshe joly salynatyn bolady. Bul jumystardy «AtyraýInjStroı» JShS atqarady. Joba quny 7,2 mrld teńgeni quraıdy. Qurylys jumystary jyl sońyna deıin aıaqtalady. Qazir 22 kóshe tolyqtaı tegistelip, qum, qıyrshyq tas, bir kóshege asfalt jabyndysynyń birinshi qabaty tóseldi», dedi E.Haınollaev.
Maqat aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Temirbek Ińirbaıdyń málim etkenindeı, «Dossor kentindegi 23,6 shaqyrym avtokólik jolyn salý» jobasy bastalǵan. Bıyl munaıshylar mekeninde 10,4 shaqyrym kólik, 5,6 shaqyrymǵa jaıaý júrginshi joly salynbaq. Turǵyndar úshin mańyzdy jumysty «AtyraýınjstroıKazServısGrýpp» JShS jyl sońyna deıin aıaqtaýdy mindetine alǵan.
«Bul kólik ınfraqurylymyn damytyp, oblystyq jáne aýdandyq mańyzdaǵy joldardyń jaqsy jáne qanaǵattanarlyq deńgeıin 76 paıyzǵa jetkizedi. Eń bastysy, turǵyndardyń áleýmettik ahýalyn jaqsartýǵa, aýdandar men eldi mekenderdegi kásipkerlik, aýyl sharýashylyǵy salalaryn órkendetý isi keń qanat jaıady», deıdi oblys ákiminiń orynbasary Qaırat Nurtaev.
Atyraý oblysy
