Ulytaý oblysyndaǵy jobanyń alǵashqy tusaýkeseri Sátbaev qalasyndaǵy Tólek batyr alańynda boldy. «Meıirimdi júrek» dep atalǵan demalys keshin qaladaǵy Oqýshylar saraıy, О́ner mektebi jáne №2 mýzyka mektebi birlesip atqardy. Atalǵan is-sharaǵa 300-ge jýyq oqýshy jáne olardyń ata-analary tartyldy. Aıryqsha atap óterligi, is-shara qaıyrymdylyq aıasynda ótti. Keshke erekshe kútimdi qajet etetin balalar arnaıy qonaq retinde shaqyryldy.
Balalar men ata-analar ulttyq oıyndardyń saıystaryna qatysty. Arqan tartý, asyq atýǵa bala da, úlken de qatysyp, máre-sáre boldy. On saýsaǵynan óner tamǵan ismerler balalarǵa sol jerde keste tigip, monshaq toqý, t.b. úıretti. «Dýyldaǵan orkestr» ónerge qyzyǵýshylyq tanytqan balalarǵa kez kelgen mýzykalyq aspapta oınap, óz qabiletterin baıqap kórýge múmkindik berdi. Oqýshylar saraıynda bıyldan bastap jumys isteı bastaǵan Sadaq tartý úıirmesiniń «surmergenderi» de keshtiń qyzyqty da mazmundy ótýine belsene atsalysty.
– Másele jeńis nemese jeńiliste emes. Mundaı is-shara bir-birimizdi tanyp-bilýge, balalardy ulttyq qundylyqtarǵa jaqyndata túsedi. Sondyqtan uıymdastyrýshylarǵa alǵys aıtamyz, deıdi ata-analar lebizin jetkizgen Laýra Smaǵulova.
Qalalyq bilim bólimine qarasty úsh qosymsha bilim berý uıymynda 7 myńǵa jýyq bala bar. Olardyń ishinde ónerli órender kóp-aq. Kesh barysynda olar sol ózderi jasaǵan zattarynan jármeńke ótkizdi. Al túsken qarjyny erekshe balalar tárbıelenetin ortalyqqa berildi.
Ulytaý oblysy
