Prezıdent forýmda sóılegen sózinde óziniń memlekettik sapary aıasynda jetekshi nemis kompanııalarynyń basshylaryn ala kelgen Frank-Valter Shtaınmaıerge alǵys aıtyp, Qazaqstan Germanııanyń Ortalyq Azııadaǵy eń basty ekonomıkalyq seriktesi ekenin atap ótti.
– Búginde Germanııa kompanııalary bizdiń ekonomıkamyzǵa shamamen 6 mıllıard dollar ınvestısııa quıdy. Bul ınvestısııanyń shamamen 90 paıyzy shıkizattyq emes sektorǵa tıesili ekenin aıta ketken jón. Elimizde nemis kapıtalynyń úlesi bar 1000-nan astam kompanııa belsendi jumys istep jatyr. Olardyń kópshiligi – álemge áıgili brendter, al basqalary – orta deńgeıdegi otbasylyq bıznes. Nemis kompanııalarynyń barlyǵyn Qazaqstanǵa shaqyramyz. Batyldylyqqa, naqtylyqqa jáne jaýapkershilikke negizdelgen nemis bıznesiniń tásilin baǵalaımyz. Bul qasıetter bıznestegi tabys úshin óte mańyzdy, – dedi Qasym-Jomart Toqaev.
Memleket basshysy búgin Shtaınmaıer myrzamen kezdesý barysynda tabıǵı resýrstardy birlesip barlaý jáne ıgerý isindegi yntymaqtastyǵymyzdy nyǵaıtýǵa ýaǵdalasqanyn aıtyp, bul shıkizat, ónerkásip jáne tehnologııa salalaryndaǵy seriktestik týraly úkimetaralyq kelisimge tyń serpin beretinine senim bildirdi.
Sonymen qatar Prezıdent kólik jáne logıstıka salalarynda ózara tıimdi yntymaqtastyq úshin múmkindik mol ekenine nazar aýdardy.
– Qazaqstan Eýrazııanyń júreginde ornalasqan. Munyń strategııalyq máni zor. Qytaı men Eýropa arasyndaǵy barlyq qurlyqtyq júk tasymalynyń 80 paıyzy bizdiń elimizdiń aýmaǵy arqyly ótedi. Qazirgi jańa geosaıası jaǵdaıda «Orta dálizdiń» mańyzy arta tústi. Bul – Ortalyq jáne Shyǵys Azııadan Eýropaǵa júk tasymaldaýdyń eń qysqa ári turaqty baǵyty. 2022 jyldan bastap Kaspıı dálizi arqyly Eýropalyq Odaqqa múshe elderge tasymaldanatyn júk kólemi eki ese artty. Shyǵys pen Batys arasyndaǵy ulǵaıyp kele jatqan saýda kólemine qoldaý kórsetý úshin biz ınfraqurylymdy jańartý jáne kedergilerdi joıý jumystaryn júrgizip jatyrmyz. Biz qazaqstandyq porttardyń ótkizý múmkindigin 30 mıllıon tonnaǵa deıin arttyrýdy kózdep otyrmyz, – dedi Memleket basshysy.
.jpg)
Sonymen qatar Prezıdent jańartylatyn energııa kózderin yntymaqtastyǵymyz úshin keleshegi mol sektordyń biri retinde atady.
Memleket basshysynyń pikirinshe, Qazaqstan jasyl sýtegin óndiretin álemdegi jetekshi el atanýy úshin alǵysharttardyń bári bar. Bul rette Prezıdent SVEVIND Group kompanııasymen quny 50 mıllıard dollar bolatyn jasyl sýtegin óndirý týraly kelisimge qol qoıylǵanyn atap ótip, jasyl sýtegi óndirisi ekologııalyq taza bolat, alıýmınıı jáne basqa da metaldar óndirisine jol ashatynyna nazar aýdardy.
Budan bólek, Memleket basshysy Qazaqstanyń Germanııamen ınnovasııa jáne sıfrlandyrý, adamı kapıtaldy damytý salalary boıynsha yntymaqtastyqty damytýǵa múddeli ekenin jetkizdi. Bul oraıda Qasym-Jomart Toqaev Aqtaý qalasyndaǵy Kaspıı memlekettik ýnıversıteti janynan Qazaq-nemis ınjınırıng ınstıtýtyn, sondaı-aq Shyǵys Qazaqstan tehnıkalyq ýnıversıtetiniń janynan Qazaq-nemis ǵylym jáne tehnologııalar ınstıtýtyn ashý elimizdegi adamı kapıtal men básekege qabilettilikti odan ári jetildirýge yqpal etetinine senim bildirdi.
Jıynda sondaı-aq Germanııa Prezıdenti Frank-Valter Shtaınmaıer, Qazaqstan Respýblıkasy Indýstrııa jáne ınfraqurylymdyq damý mınıstri Marat Qarabaev, Germanııanyń Federaldyq ekonomıka jáne klımatty qorǵaý mınıstri Ýdo Fılıpp sóz sóıledi.
