Toıǵa jınalǵandar Tobyl jaǵalaýyna tigilgen aqshańqan kıiz úıler men bóreneden órilgen tatardyń aǵash úıinen dám tatyp, jergilikti ónerpazdar men Aqtóbe oblysynan, Tatarstannan arnaıy kelgen ánshi-bıshilerdiń ónerin tamashalady.
– Sabantoı Qostanaı óńirinde burynnan toılanyp keledi. Sondyqtan muny tek tatardyń nemese bashqurttyń ǵana merekesi dep aıta almaımyn. Bul bizdiń óńirdiń toıy. Merekege qanshama halyq kelip, konsert kórip, demalyp, sport jarystaryn tamashalap jatyr. Tatar men bashqurttyń ulttyq ashanasy asa baı. Toıǵa jınalǵan kópshilik tatardyń qýyrdaq, chak-chak, oramasynan aýyz tıip, qazaqtyń bal qymyzymen shól basyp jatyr. Bul jarasymdy emes pe, – deıdi oblystyq tatar-bashqurt ulttyq mádenı ortalyǵynyń tóraǵasy Rınat Bektemirov.
Merekede Aqtóbeden kelgen «О́mirzaıa» halyq ansambli, Rýdnyıdaǵy «Baıram» tatar-bashqurt ansambli, Tatarstannyń halyq ártisi, ánshi-kompozıtor Lıllııa Mýllaǵalıeva óner kórsetti.
– Jol shalǵaı bolǵan soń, sharshańqyrap jettik. Biraq Qostanaı halqynyń ystyq yqylasy boıymyzǵa kúsh berip, sharshaǵanymyzdy umytyp kettik. Repertýarymyzda otyzdan astam án bar, búgin sonyń eń tańdaýlylaryn ǵana oryndaımyz. Sabantoı bizdiń óńirde de ótip turady. Biz de kórshi eldiń shekaralas aımaqtaryna baryp, konsert qoıyp, ondaǵy az sandy ulttardyń mádenıetimen tanysyp, tájirıbe almasyp turamyz, – deıdi ansambl múshesi Ásııa Faızova.
Mereke alańynda balalarǵa arnalǵan alýan túrli oıyndar men baıqaýlar uıymdastyryldy. Al qarııalar kıiz úıdiń aldyndaǵy tapshanǵa jaıǵasyp, toıdyń qyzyǵyn shaı iship otyryp tamashalady.
Qostanaı oblysy
