Shamshadınniń shoqtyǵy bıik
Asa jeńil salmaqta beldesken 26 jastaǵy Maǵjan Shamshadın Astanadaǵy jarqyn jeńisinen keıin segiz satyǵa joǵarylap, qazirgi kezde 13-oryndy ıelendi. Onyń qorjynynda 3238 upaı bar. Eger de Syr boıynyń saıypqyrany taǵy bir týrnırde eleýli tabysqa qol jetkizse, onda TOP-10-dyqtyń qataryna enetini anyq. Ázirge bul – Qazaqstannyń erler qurama komandasy músheleri arasyndaǵy eń úzdik kórsetkish.
Dál osy salmaq dárejesinde kúsh synasyp júrgen Eldos Smetov (2158 upaı) 23-orynǵa taban tirese, Nurqanat Serikbaev (1842) 25-satyǵa jaıǵasty. Elorda tórinde ótken jarysqa Eldos qatysqan joq. Al Nurqanat tusaýkeser kezdesýinde jeńilistiń kermek dámin tatty. Qazirgi kezde osy úsh balýannyń qarqyny jaqsy. Osyndaı myqtylardyń bir salmaqta ózara tartysqa túsýi básekelestikti arttyrady. Al básekelestik bar jerde nátıjeniń de bolýy zańdy. Biraq Olımpııa oıyndarynyń jóni bólek. Bul jerde bir salmaq dárejesinde bir ǵana balýannyń baq synaıtyny belgili. Olaı bolsa, Parıj Olımpıadasyna qatysýdy maqsat tutqan apaıtóster aldaǵy reıtıngtik jarystarda barynsha tabysty óner kórsetýge tıis. Osy úshtiktiń arasynan kimniń aıdarynan jel esetinin ázirge eshkim dóp basyp aıta almaıdy. Sondaı-aq Baýyrjan Narbaev (1277 upaı) pen Sherzod Davlatovty (917 upaı) da tizimnen syzyp tastaýǵa bolmaıdy. IJF reıtınginde Baýyrjan – 35, Sherzod 44-oryndy enshilegen.
66 kılo salmaqta kúresetin Ǵusman Qyrǵyzbaevtyń Astanada kúmis medaldy ıelengeni málim. Sonyń arqasynda ol tórt satyǵa joǵarylap, bul kúnderi 19-oryndy ıemdenýde. Ǵusmannyń enshisinde 2615 upaı bar. 73 kılo salmaqta synǵa túsken Asqar Narqulov (814 upaı) «Qazaqstan Barysy Grand Slam 2023» týrnırindegi tabysynan keıin birden 49 qarsylasyn artqa tastap, búgingi tańda 57-orynǵa turaqtady. Bul – óte tamasha kórsetkish. Desek te Narqulovqa Danııar Shamshaev pen Jansaı Smaǵulovqa jetý úshin áli kóp ter tógý kerek. О́ıtkeni elishilik jarystardaǵy basty qarsylastary oǵan qaraǵanda áldeqaıda joǵary tur. Jas daryn Danııar 15 (2816 upaı) jáne saqa sportshy Jansaı (1754 upaı) 25-oryndardy ıelenýde.
81 kılo salmaqtaǵy Abylaıhan Jubanazar Astanada alǵashqy aınalymnan asa almady. Sol sebepti jaǵdaıyn jaqsartýǵa esh múmkindigi bolmady. Qazir ol 19-oryndy (1905 upaı) enshilep otyr. 90 kılo salmaq dárejesindegi jaǵdaıymyz tipten múshkil. Eń úzdik nátıje Dıdar Hamzaǵa tıesili. Azııa oıyndarynyń jeńimpazy 26-oryndy ıelenýde. 100 kılo salmaqta elimizdiń birde-bir dzıýdoshysy Nurlyhan Sharhandy qýyp jete alar emes. Ol 22-orynǵa (2340) taban tiredi. Islam Bozbaev 43 (990 upaı) pen Bekarys Sádýaqas (803 upaı) 49-satyǵa jaıǵasty.
Alyptarmen aıqasyp júrgen Ǵalymjan Qyryqbaı men Ádil Orazbaev ótken aptanyń basynda álemdik reıtıngte qatar turǵan edi. Elorda tórinde Ǵalymjan qola medaldy moınynda jarqyratty. Sonyń arqasynda ol segiz satyǵa joǵarylap, 31-oryndy (1590 upaı) enshiledi. Ádil á degende-aq utylyp, 42-oryndy (990 upaı) qanaǵat tutty.
Kóshbasshylar jaıynda aıtar bolsaq, taıaýda ǵana Grýzııanyń tórt dzıýdoshysy IJF reıtınginde kósh bastaǵan edi. Qazir solardyń úsheýi óz oryndaryn saqtap qaldy. Olar – Tato Grıgalashvılı (81 kılo), Lýka Maısýradze (90 kılo) jáne Ilıa Sýlamanıdze (100 kılo). Al Lasha Shavdatýashvılı (73 kılo) ázerbaıjandyq Hıdaıat Geıdarov pen mońǵolııalyq Send-Ochıryn Sogtbaatardy alǵa jiberip, úshinshi oryndy qanaǵat tutty. Qalǵan salmaq dárejelerinde taıpeılik Iаn Iýnveı (60 kılo), moldovalyq Denıs Vıerý (66 kılo) jáne tájikstandyq Temýr Rahımov (+100 kılo) jeke-dara kósh bastap tur.
TOP-10 dzıýdoshynyń sanatyna Grýzııa men Japonııanyń – 9, Ázerbaıjannyń – 7, О́zbekstannyń – 5, Mońǵolııa, Fransııa, Kanadanyń – 4, Ońtústik Koreıa men Nıderlandtyń – 3, Belgııa, Izraıl, Italııa, Brazılııa, Kýbanyń – 2, Ispanııa, Taıpeı, Moldova, Ýkraına, Shveısarııa, Aýstrııa, Túrkııa, Majarstan, Reseı, BAÁ, Chehııa jáne Tájikstannyń 1 ókili endi. О́kinishke qaraı, úzdikter sanatynda Qazaqstannyń birde-bir balýany joq.
Aqerkeniń aıaqalysy unady
Áıelder arasyndaǵy jarystarda aýyz toltyryp aıtarlyqtaı tabystarǵa qol jetkizip júrgen Ábıba Ábýjaqynova jaraqatyna baılanysty Astanadaǵy «Qazaqstan Barysy Grand Slam 2023» týrnırine qatyspady. Soǵan qaramastan, otandyq dıýdoshylar arasynda eń úzdik kórsetkish dál sol sportshyǵa tıesili. Ábýjaqynova IJF reıtıngindegi óziniń altynshy ornyn saqtap qaldy. Jáne de jaraqatynan tolyqtaı aıyqqannan keıin Ábıba bul nátıjesin jaqsartamyn dep qulshynyp otyr. Bıylǵy jylǵy Ábıbanyń basty maqsaty – qyrkúıek aıynda Qytaıda alaýy tutanatyn jazǵy Azııa oıyndarynda atoı salý.
Elorda tórinde uıymdastyrylǵan týrnırde +78 kılo salmaqta synǵa túsip, qola medaldy moınynda jarqyratqan Aqerke Ramazanova birden 21-satyǵa joǵarylap, bul kúnderi 33-oryndy ıelendi. Bul – eleýli tabys. Desek te Aqerke áli de Kámıla Berliqashqa jete almaı keledi. Tanymal dzıýdoshy 18-oryndy enshilegen. Berliqash byltyr Ulanbatyrda jáne bıyl Bakýde úzdik úshtikti túıindedi. Tbılısı, Almada jáne Tashkentte besinshi orynǵa taban tiredi. Bul – Ramazanovanyń «Úlken dýlyǵa» sanatyndaǵy týrnırlerdegi tyrnaqaldy tabysy. Shyny kerek, asa aýyr salmaqta eki myqty balýannyń bir-birimen básekeles bolýy bizdi qatty qýantyp otyr. Onyń ústine ekeýi de jas sportshylar. Atap aıtsaq, Kámıla – 23, al Aqerke – 22 jasta. Keleshekte bul balýandardyń biraz bıik belesterdi baǵyndyratyny anyq.
TOP-50-diń qataryna engen ózge jerlesterimizdiń nátıjeleri mynadaı: Ǵalııa Tynbaeva (48 kılo) – 31-oryn, Arýna Jankeldına (70 kılo) – 36, Nazgúl Maratova (+78 kılo) – 43 jáne Sevara Nyshanbaeva (57 kılo) – 44-oryn. О́kinishke qaraı, ózge burymdylarymyz senim údesinen shyǵa almaı júr.
Álemdik reıtıngte ár memlekettiń bir-bir ǵana ókili kósh bastap tur. Olar – fransııalyq Shırın Býklı (48 kılo), kosovolyq Dıstrııa Krasnıchı (52 kılo), kanadalyq Krısta Degýchı (57 kılo), ulybrıtanııalyq Lıýsı Renshall (63 kılo), japonııalyq Sakı Nıızoe (70 kılo), ıtalııalyq Elıs Bellandı (78 kılo) jáne ızraıldik Raz Gershko (+78 kılo). Al TOP-10 dzıýdoshynyń tizimine Fransııanyń 11 ókili enip otyr. Japonııa quramasy da olardan qalysatyn emes. Kúnshyǵys eliniń 9 ókili úzdikter sanatynda. Odan keıingi eń táýir kórsetkish myna komandalarǵa tıesili: Izraıl men Germanııa – 5, Brazılııa – 4, Italııa, Kosovo, Nıderland, Kanada – 3, Mońǵolııa, Ispanııa, Portýgalııa, Ulybrıtanııa, Ońtústik Koreıa, Horvatııa, Qytaı – 2, Serbııa, Qazaqstan, О́zbekstan, Majarstan, Grýzııa, Polsha, Aýstralııa, Aýstrııa, Grekııa jáne Túrkııa – 1.
