Batys Qazaqstan oblysynda týyp-ósken 35 jastaǵy Dáýren Ermekov qazirgi kezde Aqtóbedegi «Erkin kúsh» klýbynda jattyǵady. Sporttyq mansabyn 2012 jyldyń kúzinde bastaǵan ol osy kúnge deıin 22 kezdesý ótkizip, 17 ret jeńiske jetti. 10 qarsylasyn esinen tandyrdy. Buǵan deıin Ermekov «Eagle FC» men «Naiza Fighting Championship» chempıondyq ataǵyn ıelendi. Rýslan Shamılovtyń jasy 27-de. Ol – Reseıdiń Pskov oblysynyń týmasy. Kásipqoılar arasyndaǵy jarysta 16 márte oktagonǵa shyǵyp, 12 ret basymdyq tanytty. Toǵyz básekeni merziminen buryn aıaqtady.
Jekpe-jek bastalǵan bette ekeýi tik turyp aıqasty. Bul jerde eshkimniń basymdyǵy baıqalmady. Ekinshi raýndta Dáýren kúreske kóbirek kóńil bólýdi qup kórdi. Bul taktıka óz jemisin berdi. Ol qarsylasyn qaıta-qaıta jyǵyp alyp, jerde ábden ýmajdady. Qazaq faıteriniń soqqylary da qarsylasyna jıi darydy. Rýslan tek qaýipti jaǵdaıdan qutylýdy ǵana oılady. Biraq Ermekov ony temir qursaýynan ońaılyqpen bosatpady. Qalǵan raýndtarda da sol kórinistiń kýási boldyq. Nátıjesinde, barlyq tóreshi Dáýren Ermekovtiń myqtylyǵyn biraýyzdan moıyndady.
Jasyratyny joq, sol keshte «Almaty Arenany» betke alǵan jankúıerlerdiń deni asa aýyr salmaqtaǵy Vıacheslav Dasık pen Ǵalymjan Jaslanovtyń jekpe-jegin kórýge erekshe qulshynys tanytty. О́ıtkeni «Sary Tarzannyń» ataǵy alysqa jaıylǵan. Iá, kóbine-kóp jaǵymsyz keıipte ekenin de moıyndaımyz. Rasynda da, Dasıktiń istemegeni joq. Onyń júrgen jeri janjal, aıǵaı-shý, daý-damaı... Aıqas alańynda erejeni óreskel buzyp, qarsylasy nemese tóreshilermen tóbeleskeni bylaı tursyn, kóshede adamdardy uryp, dúkender men salondardy tonady. Sol úshin ústinen qylmystyq is qozǵalyp, biraz jylyn temir qapasta da ótkizdi. Júıke aýrýyna shaldyqqandardyń aýrýhanasyna da jatyp shyqty. 2010 jyly Vıacheslavtyń shekarany zańsyz buzyp ótip, Norvegııadan bir-aq shyqqany bar. О́ziniń aıtýynsha, Skandınavııa túbegine jetý úshin ol teńizde eki kún boıy rezeńke qaıyqpen júzgen eken. Bir sózben aıtsaq, «Sary Tarzannyń» ómiri osyndaı shytyrman oqıǵalarǵa toly.
Joǵarydaǵy jaǵymsyz jaıttarǵa qaramastan, Vıacheslav Dasıktiń myqty sportshy ekenine eshkimniń kúmáni joq. 43 jastaǵy Lenıngrad oblysynyń týmasy aıqas alańynda Andreı Orlovskıı, Djeronımo Dos Santos jáne Aleksandr Emelıanenko syndy ataqty sportshylardy kesken terekteı sulatyp salyp, dańqty Djeff Monsondy upaı sanymen utty. Aralas jekpe-jekten nebári eki kezdesý ǵana ótkizgen Ǵalymjan Jaslanovtyń Dasıkpen judyryqtasatynyn estigende qazaq jankúıerleri qatty mazasyzdandy. Shyny kerek, biz «qandasymyz qulap qalmasa eken» dep ishteı tiledik.
Biraq TT degen janama esimmen tanylǵan Ǵalymjannyń júreginiń túgi bar eken. Atyshýly Dasıkpen ol aıanbaı aıqasty. Qoryqqan da, qaımyqqan da joq. Ekinshi raýndta qarsylasyn uramyn dep qapııada Jaslanovtyń aıaǵy taıyp ketti. Istiń mán-jaıyna boılamaǵan tóreshi birden nokdaýn belgiledi. Oǵan qazaqtyń qaısar uly qatty ýaıymdaı qoıǵan joq. Kerisinshe, ýaqyt ozǵan saıyn batyl qımyldap, qalaı da jeńiske jetýdi kózdedi. О́zinen salmaǵy 20 kılo aýyr, boıy bir bas joǵary Vıacheslavtyń aýyr soqqylarynan saýatty qorǵana bildi. Tipti bir-eki ret temir torǵa tirep qoıyp, serııalyq soqqylaryn sátti ótkizdi. Ol kezderi Dasık táltirektep baryp, esin ázer jıdy. Báseke aıaqtalǵan soń úsh tóreshiniń ekeýi jeńisti bizdiń jigitke berse, bireýi teń esep tirkedi. Sóıtip, basym daýyspen TT jeńiske jetti.
Tóreshi Jaslanovtyń qolyn kótergen sátte Dasık bul sheshimmen kelispeıtindeı syńaı tanytty. Al Ǵalymjan bolsa, «Kelesi joly Máskeýdiń tórinde MMA erejesi boıynsha tóbeleseıik», degen usynys aıtty. Biraq «Sary Tarzan» odan bas tartty. «Meniń jasym birazǵa keldi. Egde tartqan adam úshin alysyp-julysý ońaı sharýa emes. Odan opa tappaıtynym anyq. Sol sebepti de aralas jekpe-jektiń erejesi boıynsha aıqasýdan bas tartamyn. Al tik turyp tóbeleseıik deseń, oǵan men árkez daıynmyn», dep jaýap qaıyrdy.
Qazaqtyń qos sańlaǵy – Qazybek Saǵyn men Baǵdat Jubanysh sýper jeńil salmaqtyń (53 kılo) altyn belbeýi úshin talasty. Ekeýiniń de álemniń úsh dúrkin chempıony degen dardaı ataǵy bar. Qazybek – qoıan-qoltyq aıqastyń, al Baǵdat – MMA-nyń has sheberi. Osydan birneshe jyl buryn olar áýesqoılar arasyndaǵy jarystyń birinde kúsh synasqan edi. Ol kezde Jubanysh tóreshilerdiń sheshimimen jeńiske jetti. Bul joly kerisinshe boldy. О́te shıelenisti ótken básekede Qazybek Saǵynnyń joly bolyp, chempıondyq ataq sol sportshyǵa buıyrdy. Biraq qazylardyń sheshimi kórermenderdiń basym bóligin qanaǵattandyrmady. Baǵdattyń mysy basym bolǵanyn alǵa tartqan olar jer tepkilep, aıǵaıǵa basty. Jekpe-jek aıaqtalǵan soń Baǵdat Jubanysh tóreshilerdiń sheshimimen kelispeıtinin aıtyp, óz narazylyǵyn bildirdi.
«Almaty Arenaǵa» jınalǵan jankúıerler sol keshte Álibı Ydyrystyń asqan sheberligine tamsandy. Kúni búginge deıin jeti jekpe-jek ótkizip, barlyǵynda aıqyn basymdyq tanytqan 29 jastaǵy qazaq sportshysyna bul kúnderi UFC-diń maıtalmandary da qyzyǵýshylyq tanytyp otyr. Osy jyldyń aıaǵyna deıin Ydyrysty álemniń eń beldi promoýsheni uıymdastyratyn jarystardyń birinen kórýimiz ábden múmkin. Oǵan ol laıyq dep oılaımyz. Bul joly Álibı osy kúnge deıin birde-bir ret jeńilistiń kermek dámin tatpaǵan brazılııalyq Alısson Sılvany san soqtyrdy.
