Is-sharanyń ashylý saltanatyna tanymal jýrnalıst, «Aq jol» partııasy ulttyq keńesiniń hatshysy Arman Sqabyluly, Parlament Senatynyń depýtaty Bıbigúl Jeksenbaı, «Habar» agenttigi» AQ basqarma tóraǵasy Berik Ýálı, belgili jýrnalıster Qaınar Oljaı, Dana Nurjigit, Jaına Slambek pen Amangeldi Seıithannyń uly Begasyl Seıithan qatysty.
Týrnırde aqparat, mádenıet, ádebıet salasynyń 40-tan asa ókili on úsh komandaǵa (ár komandada 3 oıynshy) bólinip, jarystyń bas júldesin sarapqa saldy. Al tastaıaq básekesine Amangeldi Seıithannyń ustazy, dańqty sport jýrnalısi Nesip Júnisbaıuly tórelik etti.
Týrnır qorytyndysy boıynsha «Sport» gazetiniń jýrnalısteri júldeli úshinshi orynǵa ıe boldy. Bul komandanyń quramynda áriptesimiz, «Egemen Qazaqstan» gazetiniń áleýmet jáne sport bóliminiń tilshisi Baqytbek Qadyr da bolǵanyn aıta ketken jón. Ekinshi oryn «Ulttyq arna» komandasyna buıyrsa, bas júldeni astanalyq qalamgerler komandasy qanjyǵasyna baılap, jarys jeńimpazy atandy.
Jarys sońynda týrnırge qatysýshylar Amangeldi Seıithan týraly estelikter aıtyp, onyń talantty jýrnalıst qana emes, ózin naǵyz azamat retinde tanytqanyn atap ótti. Sonymen qatar «Aq jol» partııasynyń tóraǵasy Azat Perýashev qatysýshylardy alda kele jatqan kásibı merekelerimen quttyqtap, qonaqtarǵa alǵyshattar men estelik syılyqtar tabys etti.
