Mınıstr Darhan Qydyráli BAQ qyzmetkerlerin kásibı merkesimen quttyqtap, sóz sóıledi.
«Barshańyzdy kásibı merekemen shyn júrekten quttyqtaımyn. Kesheli beri jýrnalısterdiń kóńil kúıi erekshe dep oılaımyn. Keshe memleket basshysynyń tapsyrmasy boıynsha elimizdiń bir top BAQ qyzmetkerlerine páter tabystaldy. Memlekettiń bul qoldaýy ári qaraı jalǵasa beredi. Sondaı-aq búgin Prezıdent syılyǵy tabystaldy. Laıyqty ıeleri alyp jatyr dep oılaımyz. Osy salaǵa jaýapty mınıstrlik retinde de jýrnalısterge tartý jasaýdy oılaǵan edik. Solardyń ishinde birneshe josparymyz bar. Búgin sonyń alǵashqysy Mádenıet mınıstrligin jáne Ulttyq mýzeıdiń qoldaýymen baspasóz mýzeıin ashýdy jón kórdik. Shyn máninde, ótkensiz bolashaq joq. Jalpy tarıh degen bizdiń tek ótken jolymyz emes ol – jarqyn bolashaǵymyz. Biz tarıhqa úńilý arqyly oǵan taǵzym etemiz, odan taǵlym alamyz jáne bolashaǵymyzdy túzemiz. Sol sııaqty baspasózimizdiń ótkeni bolashaǵymyzǵa jón silteıdi», dedi Darhan Qydyráli.
Sondaı-aq mınıstr ashylyp jatqan kórmeniń maqsatyna toqtalyp ótti.
«Telearnada, radıoda, gazette qoldanylǵan zattardyń barlyǵyn jastarymyz kórsin, jýrnalıstıkaǵa tartylsyn, aǵa býynnyń eńbegine taǵzym etsin, eńbegin baǵalasyn degen oımen osy mýzeıdi ashý oıy týǵan edi. Onyń ishinde gazettiń sarǵaıǵan betteri de bar, kóne jádigerler bar. Sondyqtan bizdiń sonaý «Dala ýálaıatynan», «Serkeden», «Qazaq» gazetinen Alash qaıratkerlerinen bastalatyn baspasózimizdiń shejiresi osy mýzeı arqyly kórinis tabady dep oılaımyn», dedi ol.
Sonymen qatar Prezıdenttiń marapattardy tabystaý sátinde qazaq baspasózine joǵary baǵa bergenin, ortalyq Azııada jetekshi memleketke aınalyp kele jatqanymyzdy, jalpy halyqaralyq deńgeıde suranysqa ıe bolyp otyrǵanymyzdy atap ótkenin aıtty. Ári búgingi BAQ-tyń damýyna qatysty pikir bildirdi.
«Gazet pen gadjet almasqan zamanda, jańa tehnologııalar almasyp jatqan tusta, myna kúrmeýi qıyn kúrdeli kezeńde bizdiń de zamannyń talabyna, ýaqyttyń talǵamyna saı jumys isteýimiz kerek. О́kinishke qaraı, qazir jańalyqtar jedel tarap jatqanymen, jadymyz qysqaryp bara jatyr. Aqparattar legi óte tez aınalady jáne eki kún buryn ne bolǵanyn umytyp qalamyz. Eń rezonansty degen jańalaqtardyń ózi lentada bir-eki kún turady. Mysaly, biz buryn sýretke túsetinbiz, sol sýretti shyǵaryp albom jasap qoıatynbyz. Qazir telefonmen kez-kelgen jerde sýretke túsemiz, biraq olar óshirilip qalady. Kezinde qanshama daýystar dıktofonǵa jazylǵan. Saqtaýly tur. Al telefonǵa jazyp alǵan daýystar óship qalyp jatady. Sondyqtan telefon jumysymyzdy jedeldetip, jaqsartyp qolaıly jaǵdaı týǵyzǵanymen, bir jaǵy jadymyzdyń ds qysqarýyna sebep bolyp otyr», dedi Aqparat jáne qoǵamdyq damý mınıstri Darhan Qydyráli.
Mınıstr sóz sońynda qýanyshty jańalyqty bólisti.
«Súıinshi bir jańalyǵymyzdy aıtqym kelip otyr. Biz qys mezgilinde «Qazaq» gazetiniń dúnıege kelgen 2 aqpan kúnin Qazaq baspasóziniń kúni dep jarııalaý týraly bastama kótergen edik. Sol usynys qabyldandy. Jýrnalıster kúni aıasynda jarııalanýy kerek. Budan bylaı 2 aqpan – Qazaq baspasóziniń kúni bolady. Bizdiń júrip ótken jolymyz bizdi bolashaqqa aparatyn jol», dedi Darhan Qydyráli.
Sondaı-aq is-sharaǵa Mádenıet jáne sport vıse-mınıstri Nurǵısa Dáýeshov qatysyp, tilek aıtty.
«Sizderdi kásibı merekemen shyn júrekten quttyqtaımyn. Meniń oıymsha, adamǵa kóńil-kúı syılaıtyn eki mamandaq bar. Onyń biri – jýrnalıstıka, biri – mádenıet. О́ıtkeni adam balasy jaqsy jańalyq estise qýanady, jáne ádemi áýen tyńdasa, ádemi kartına kórse kóńili marqaıady. Sondyqtan biz tańdaǵan mamandyqtan adamzatqa paıdasy zor dep oılaımyn. Qazaq mýzykasynyń uly tulǵasy Qurmanǵazynyń shyǵarmalaryn búgingi tańǵa, urpaqtarǵa jetkizgen jyrshy-jyraýlar bolatyn. Qurmanǵazynyń qasynda Qashaǵan degen jyraý júrip, onyń kúılerin aýyzeki halyqqa nasıhattaǵan bolatyn. Bizdiń batyrlarymyzdyń batyrlyǵyn, aqyndarymyzdyń aqyndyǵyn, kúıshilerimizdiń ónerin keńinen nasıhattap otyrǵan. Sol sekildi 21 ǵasyrda da qazaq mádenıetin bolashaqqa jetkizip jatqan sizderdiń tabandy eńbekterińiz. Sondyqtan sizderge mádenıet salasyndaǵy adamdardyń atynan alǵys bilderemiz», dedi vıse-mınıstr.
Is-shara barysynda ardager jýrnalıster sóz sóılep, merekemen quttyqtady.
«Ardaqty áriptester, qos mereke qatar kelip tur eken. Bizdiń tól kásibı merekemiz, ekinshisi jańa ǵana mınıstr myrza aıtqan jaqsy jańalyq – Qazaq baspasóziniń kúni. Qos mereke qutty bolsyn. Bizdiń kásiptiń qadir-qasıeti týraly aıtaıyn degenimde, týp-týra 47 jyl burynǵy jaǵdaı esime túsip tur. 1976 jyly jas jýrnalısterdiń birinshi semınary boldy. Sol sharada Genrıh Borovıktiń áńgimesi esimde qaldy. Genrıh Averıanovıch: «Sizder ómirinde kóptegen adamnyń ǵumyryn keshe alatyn mamandyqty bilesizder me?» dedi. Adamdar bilemiz, ol akter mamandyǵy dep jatty. «Durys akter han da bolady, qarasha da bolady, basqa da bolady. Ekinshisi qandaı dep edi, jurt tosylyp qaldy. Sonda Borovıktiń aıtqan sózi: «Ekinshi mamandyq ol – sizderdiń mamandyqtaryńyz - jýrnalıst mamandyǵy. О́ıtkeni jýrnalıst - óziniń ǵumyrynda kóptegen adamnyń ómirin súre alatyn baqytty maman. Osy baqytty mamandyq ıelerin, áriptesterimdi kásibı merekemen quttyqtaımyn», dedi Qazaqstannyń eńbek sińirgen qaıratkeri Saýytbek Ábdirahmanov.
QR eńbek sińirgen qaıratkeri Álibek Asqarov ta BAQ ókilderin quttyqtady.
«Bul mereke daý-damaımen kelgen. Alǵashynda kópshilik 5 mamyr Markstiń týǵan kúni qala bersin degen edi, ekinshi bir top, Parlament depýtattary, jýrnalıster kúni 10 mamyr bolsyn dedi. Nege dep edik ol kúni «Túrkistan ýálaıaty» gazeti shyqqanyn alǵa tartty. Endi usynys «Qazaq» gazetiniń shyqqan kúni boldy. Túrli pikir boldy. Ol kezde mınıstr Altynbek Sársenbaev bolatyn. Ol kisi úlken Parlamentte sóz sóıledi, al men onyń birinshi orynbasary retinde kishi komıtetterde sóz sóıledim. Sonda bizdiń túıinimiz mynaý boldy: «Durys, «Túrkistan ýálaty» da jaraıdy, biraq ol general gýbernatordyń qazaqtyń dalasyndaǵy atmosferany bilý úshin jasaǵan gazeti. Sodan keıin «Qazaq» gazeti shyqqan kún de aıtyldy. Biraq bul qys aıy ǵoı. Jýrnalıster kóńilderin jazyp bir shyrqasynshy, jaz aıy bolsyn degen oı boldy», dedi QR eńbek sińirgen qaıratkeri Álibek Asqarov.
