Túrkistan oblysynyń Sanıtarlyq-epıdemıologııalyq baqylaý departamenti habarlaǵandaı, Kentaý qalasyndaǵy «Ryzyq-Raýany» dámhanasynda kelýshilerdiń tamaqtan ýlanǵany týraly aqparat 27 maýsymda túse bastaǵan.
Dárigerlerdiń aıtýynsha, ýlanǵandar dámhanada sýshı, pıssa jáne taýyq etin jegen.
«Sodan beri aýrýhanaǵa jatqyzý sany saǵat saıyn artyp keledi. Búgingi jaǵdaı boıynsha 92 adam zardap shekti. Onyń ishinde 14 jasqa deıingi 36 bala men 47 eresek adam bar», dep habarlady departament ókilderi.
Kentaý qalalyq polısııa bólimi sotqa deıingi tergeý satysynda qylmystyq is qozǵaǵanyn aıta ketý kerek.
Tergeý barysynda atalǵan nysannyń 46 oryndyq tamaqtaný orny retinde ashylǵany anyqtaldy. Sondaı-aq Densaýlyq saqtaý mınıstrliginiń buıryǵyna sáıkes, 2023 jyldyń sáýir aıynda Kentaý qalalyq departamentine qyzmettiń bastalýy týraly habarlama jiberilgen edi.
«Tergeý barysynda birqatar kemshilikter anyqtaldy. Máselen, kásiporynda óndiristik baqylaý baǵdarlamasy joq. Kásiporyn qyzmetkerleri, ıaǵnı aspazdar men daıashylar tolyq aldyn ala profılaktıkalyq medısınalyq tekserýden ótpegen. 20 qyzmetkerdiń 12-sinde ǵana medısınalyq kitap bar. Shıkizat pen ónimniń qaýipsizdigin kýálandyratyn qujattardyń tolyq tizimi de joq. О́nimderdi saqtaýda kommersııalyq kórshilestik jaǵdaılary saqtalmaǵan, ıaǵnı et ónimderi, qus ónimderi, sút ónimderi, kókónister men jemisterdiń barlyǵy bir tońazytqyshta saqtalǵan. Qyzmetkerlerdiń jeke jáne arnaıy kıimderin saqtaıtyn oryn joq. Jumyrtqany saqtaýǵa jáne jýýǵa arnalǵan arnaıy konteıner joq. Sondaı-aq tekserý barysynda paıdalaný merzimi buzylǵan ónimder anyqtaldy. Qazirgi tańda zerthanalyq zertteýge alynǵan synamalar júrgizilip jatyr», dep qosty vedomstvo mamandary.
Departament ókilderiniń aıtýynsha, atalǵan tamaqtaný ornynda jappaı ýlaný oqıǵasy osymen úshinshi ret tirkelip otyr.
