Úkimet basshysy qazirgi ýaqytta respýblıkada bızneske qatysty jańa retteýshilik saıasat engizilip jatqanyn atap ótti. Onyń aıasynda 44 salada eńbek etetin kásipkerlerge qoıylatyn 10 myńnan astam negizsiz talap anyqtaldy. 9 myń talap joıyldy, qalǵandary boıynsha jumys jyl sońyna deıin aıaqtalady. Jalpy bul bızneske júktemeni aıtarlyqtaı azaıtýǵa múmkindik beredi.
Oǵan qosa bıyl memlekettik retteýdiń barlyq salasynda táýekelderdi basqarý júıeleri avtomattandyrylatyn bolady, bul bıznesti josparly tekserýdi eki esege qysqartýǵa múmkindik beredi.
Sondaı-aq shaǵyn jáne orta bıznesti qoldaýdyń júıeli sharalary keńeıtildi.
«О́ńdeý ónerkásibin damytý maqsatynda qoldaý kórsetiletin salalardyń tizimi 116-ǵa ulǵaıtyldy, al birqatar salada paıyzdyq mólsherlemeni sýbsıdııalaý merzimi 5-ten 7 jylǵa deıin uzartyldy. Jalpy bıznesti memlekettik qoldaý 266 mlrd teńgege deıin ulǵaıtyldy», dedi Álıhan Smaıylov.
Sonymen qatar Úkimet basshysynyń aıtýynsha, máslıhattar alǵash ret óńirdegi shaǵyn jáne orta bıznes úshin jergilikti bıýdjetke túsetin bólshek salyq mólsherlemesin 4%-dan 2%-ǵa deıin ózderi belgileı alady.
Jalpy kásipkerlikti qoldaý aıasynda bıyl 12 myńnan astam jobany sýbsıdııalaý, 12 myńǵa jýyq jobaǵa kepildik berý kózdelip otyr. Orta bıznesti qoldaý boıynsha qosymsha sharalar qabyldanady.
Munaı-gaz salasyn damytý aıasynda Qashaǵan ken ornynda jalpy qýaty 1 mlrd tekshe metrden asatyn gaz óńdeý zaýytynyń qurylysy jalǵasyp jatyr. Sondaı-aq Qashaǵanda qýaty 4 mlrd tekshe metr bolatyn taǵy 1 gaz óńdeý zaýytynyń qurylysy pysyqtalyp, Qarashyǵanaq ken ornynda qýaty 4 mlrd tekshe metr bolatyn gaz óńdeý zaýytyn salý jóninde sheshim qabyldandy. Oǵan qosa Jańaózen qalasynda qýaty 900 mln tekshe metr bolatyn jańa gaz óńdeý zaýytynyń qurylysy kúzge deıin bastalady.
Agroónerkásip kesheninde 536 mlrd teńgeni quraıtyn 300-ge jýyq joba iske asyrylýda. Bıyl memleket menshigine qosymsha 5 mln gektar aýyl sharýashylyǵy jeri qaıtarylady.
Aýyl halqynyń tabysyn arttyrý maqsatynda «Aýyl amanaty» jobasy iske asyrylyp jatyr, onyń aıasynda bıznesti damytýǵa shaǵyn nesıe berý jáne aýyl sharýashylyǵy kooperasııasyn nyǵaıtý jóninde sharalar qabyldaý josparlanyp otyr. Bıyl bul maqsatqa 100 mlrd teńge bólindi. Jalpy 7 jyl ishinde jobamen 1 mln-nan astam aýyl turǵynyn qamtý josparlanyp otyr, al ony qarjylandyrý somasy 1 trln teńgeni quraıdy.
О́ńirlerde elektr energetıkasy salasynda da jańa jobalar iske asyrylyp jatyr. Atap aıtqanda, bıyl jalpy qýaty 600 MVt-tan asatyn elektr stansııalaryn jańǵyrtý jumystary aıaqtalady. Almaty men Túrkistanda 2025-2026 jyldary jalpy qýaty 2,3 GVt-tan asatyn gaz generasııasynyń energetıkalyq jobalary iske qosylady. Qyzylordada jańa jylý elektr ortalyǵynyń qurylysy bastaldy. Kókshetaýda jáne Semeıde 2 jylý elektr ortalyǵyn salý máselesi qarastyrylyp jatyr. Sondaı-aq bıyl jalpy qýaty 276 MVt bolatyn jańartylatyn energııa kózderiniń 10 jobasy iske asyrylady.
